15 августа 2015 г.
ЛАЙĂХ çын хăй хыççăн яланах ырă ят хăварать - ун пеккине халăхра та асрах тытаççĕ. Патăрьел районĕнчех, акă, кашни çулах Анатолий аттене - Анатолий Дмитриевич Сорокина асăнса Чăваш Республикинчи пограничниксен спорт турнирĕ иртет. Сăмах май, вăл хăй те пограничник-афганец пулнă. Кăçалхи турнира республикăри 18 районтан килнĕ командăсем хутшăнчĕç. Тăван çĕршывăн чиккисене сыхласа вăхăтсăр пуç хунисене асăнса лартнă палăк умĕнче пухăннисене Патăрьел район администрацийĕн пуçлăхĕ Н.Глухов саламларĕ. Николай Иванович Анатолий атте тунă ырă ĕçсене асăнчĕ. Шел, пачăшкăн ĕмĕрĕ кĕске пулнă... Митинг хыççăн пограничниксем Тăрăн ялĕнче, пачăшкăн вилтăприйĕ умĕнче пулчĕç, чĕрĕ чечексем хучĕç. Çакăн хыççăн Кĕçĕн Патăрьелĕнчи физкультурăпа спорт комплексĕнче ăмăртусем пуçланчĕç. Вĕсенче шăмăршăсем те палăрчĕç. Кире пуканĕ çĕклекенсем хушшинче, сăмахран, Сергей Матвеев виççĕмĕш вырăн йышăнса Дипломпа пăхăр медале тивĕçрĕ. Пăшалтан тĕл перессипе Юрий Ермолаев хисеп пъедесталĕн иккĕмĕш картлашки çине хăпарчĕ. Пĕтĕмĕшле кăтартусем тăрăх Шăмăршă районĕн пограничникĕсем виççĕмĕш вырăн йышăнчĕç, хăйсем чикĕ хуралĕнче çеç мар, спортра та маттур пулнине çирĕплетрĕç.
Е.СЕТРИВАНОВ.