19 августа 2015 г.
Июльте Раççейри яваплă тапхăр - призыв компанийĕ вĕçленчĕ. Чăваш Республикин çар комиссариачĕн Патăрьелпе Шăмăршă районĕсенчи пайĕнчен пĕлтернĕ тăрăх, çурхи призывра икĕ районтан пурĕ 140 çамрăка çар службине илнĕ, çав шутран Шăмăршă тăрăхĕнчен 26 призывника. Çар комиссариачĕн планĕпе вара 120 йĕкĕте Канашри призыв пунктне леçмелле пулнă. Разнорядкăран ирттерсе 20 çын таранах çара ăсатни пай ĕçченĕсем çĕршыв пĕлтерĕшлĕ мероприятие пысăк тимлĕх уйăрнине тата яваплăхпа ĕçленине çирĕплетет. - Тĕпрен илсен, çурхи призывра службăна каяссинчен пăркаланакансем пулмарĕç, - терĕ çар комиссариачĕн Патăрьелпе Шăмăршă районĕсенчи пайĕн начальникĕ, запасри подполковник Е.Семенов. - Ку кăна та мар - икĕ районтан та, вăхăтлăха отсрочка илме май пуррине пăхмасăр, хăйсен ирĕкĕпе салтака каякансем те пулчĕç. Çамрăксем хушшинче çар службин пĕлтерĕшĕ ỹссе пыни - ырă пулăм. Евгений Степанович пĕлтернĕ тăрăх, Шăмăршă районĕнчен службăна кайнă 26 каччăран 5-шĕ - аслă, 11-шĕ - профессилле вăтам (техникум е колледж пĕтернисем), 10-шĕ пĕтĕмĕшле вăтам пĕлỹ илнĕ. 9 класс пĕтернипех çырлахнă йĕкĕтсем çук. Апла пулсан, çамрăксем службăна тивĕçлĕ пĕлỹпе кайма тăрăшаççĕ. Вăтам пĕлỹсĕр хальхи çар техникине алла илме е ытти çар специалноçĕ пе ĕçлеме йывăртарах. 8 çамрăк салтака водитель удостоверенийĕпе кайнă. Вĕсем хальхи вăхăтра - тĕрлĕ çар техникин водителĕсем. Район çамрăкĕсенчен 12-шĕ - Типĕ çĕр çинчи çарсенче (Сухопутные), 8-шĕ - Шалти çарсен подразделенийĕсенче, 2-шĕ - Тинĕс-çар флотĕнче, 2-шĕ - Центра пăхăнакан чаçсенче, пĕри - Сывлăш- десант çарĕсенче, пĕри Çар-космос çарĕсен подразделенийĕнче служба тивĕçне пурнăçлаççĕ. Районтан салтака илнĕ çамрăксене йывăр та пархатарлă службăра ăнăçу сунатпăр. Пĕр çулталăк хушши салтак стройĕнче çỹрени, физкультурăпа тактика хатĕрленĕвĕн занятийĕсенче тĕрлĕ йывăрлăхсене çĕнтерме хăнăхни сире кайран пурнăç тăршшĕпех пулăшса пырĕ. Çарта пиçĕхсе тăван кĕтесе чăн-чăн арçынсем пулса таврăннă çынсем ял-йышра та хисеплĕ.
И.МЕДВЕДЕВ.