26 августа 2015 г.
Ульяновск облаçĕн Чăваш Енри Кунĕ шавласа-кĕрлесе иртсе кайрĕ, хăйĕн илемĕпе тата таçтан-таçтан хăнасем килнипе асра юлчĕ. Мĕнлерех хаклаççĕ-ха Туслăх уявне район çыннисемпе хăнасем?
Ю.М.ФРОЛОВ, ĕç ветеранĕ, Чăваш Республикин тава тивĕçлĕ механизаторĕ, Шăмăршă ялĕ:
- Кун пек чаплă уява Шăмăршă халăхĕ нихăçан та курман тесен пĕрре те йăнăшмăп. Чăн та, Республика кунĕ те чаплă иртнĕччĕ, анчах Туслăх уявĕ хăйĕн анлăшĕпе те, мероприятисен шучĕпе те мала тухрĕ. Çанталăк йĕпе-сапаллă тăнине пăхмасăр, халăх та йышлă пуçтарăннă. Чăваш, вырăс, тутар, ирçе çыннисем - туслă халăхсем - тăрăшса ĕçленипе пĕрлех савăнма та пĕлеççĕ. Çак уяв хыççăн Ульяновск облаçĕ Чăваш Енпе тата та çывăхланчĕ, культурăпа спортра çеç мар, экономикăра та ырă улшăнусем пуласса çирĕп шанатăп.
А.С.ШАКИН, Раççей тата Чăваш Республикин культурин тава тивĕçлĕ ĕçченĕ, Патăрьел районĕн хисеплĕ гражданинĕ:
- Тĕлĕнсе каймалла чаплă уяв! Ульяновск облаçĕнчи тата хамăр республикăри чи лайăх фольклор ушкăнĕсем, чи маттур артистсем хăйсен пултарулăхĕпе чĕрене тыткăнларĕç. Шăмăршă район администрацийĕ çакăн пек пысăк пĕлтерĕшлĕ уява чи çỹллĕ шайра йĕркелерĕ. Ипподром та Хусантинчен пĕрре те кая мар.
В.А.МОЖАРОВ, Етĕрне районĕнчи Хотяш ялĕнчи «Вирьял» ансамбль параппанçи:
- Уявра çĕнĕ туссем тупрăмăр, пĕр-пĕрин пултарулăхĕпе паллашрăмăр. Шăмăршă ялĕ те, вăрманĕ те, ипподром та çав тери килĕшрĕç. Уява видеокамерăпа ỹкерсе илтĕмĕр-ха, районти культура ĕçченĕсене тата учительсен августри конференцине хутшăнакансене кăтартатпăр.
А.В.ЧУГУНОВ, Ульяновск хулинчи Спорт Керменĕнчи ирĕклĕ майпа кĕрешекен спортсменсен тренерĕ, Раççей чемпионĕ:
- Уява спорт ăмăртăвĕсем тата та илемлетрĕç, пуянлатрĕç. Шăмăршă районĕнче вăй илнĕ туслăх Шупашкарта тата та çирĕпленĕ. Пире сирĕн тĕп хулăрти спорт ăмăртăвĕсене ятарласах чĕнчĕç. Çавăн пекех Чăваш Ен спортсменĕсене хамăр патăрта иртекен ăмăртусене хапăл тусах кĕтетпĕр. Спорт пирĕн туслăха тата та ытларах çирĕплетĕ.
С.ИВАНОВ калаçнă.