02 сентября 2015 г.
.jpg "Ача куллиллĕ илемлĕ уяв")
Сентябрĕн 1-мĕшĕ çитессе ачасем çеç мар, вĕсен ашшĕ-амăшĕ те, учительсем те тỹсеймесĕр кĕтрĕç. Ашшĕ-амăшĕ кăна-и? Аслашшĕпе асламăшĕ те, кукашшĕпе кукамăшĕ те мăнукĕ пĕрремĕш хут шкула кайнă куна пысăк уяв тесе шутлаççĕ. «Шкула, ачасемĕр, шкула, Ларар парттăсем хушшине», - ача чух вĕреннĕ çак сăвă йĕркисем ĕмĕр тăршшĕпех асран тухмаççĕ. Пĕлỹ кунĕ ячĕпе савăнăçлă мероприятисем районти кашни шкултах чаплă та асра юлмалла иртнĕ. Районĕпе 1503 вĕренекен парттăсем хушшине ларнă. Çав шутра 154 вĕренекен - пĕрремĕш класа пуçласа килнисем. Район администрацийĕн пуçлăхĕ В.П. Фадеев Васанти тĕп шкулта Пĕлỹ кунĕ ячĕпе ирттернĕ уява хутшăннă. Хăйĕн саламлă сăмахĕнче Валерий Петрович çакна палăртнă: хальхи вăхăтра пурнăç хăвăрт улшăнса пыни вĕрентỹ тытăмне те витĕм кỹрет. Çĕнĕ вĕренỹ çулĕ общество аталанăвĕн çĕнĕ тапхăрĕ пулĕ. Раççейри пĕтĕмĕшле пĕлỹ тĕп шкулĕ федерацин патшалăх тĕп стандарчĕсем çине куçĕ. Çĕнĕлĕхсем шкул коллективĕн пурнăçне ыррине кăна кĕртсе пыччĕр. Чăваш Республикин Пуçлăхĕн тивĕçĕсене вăхăтлăх пурнăçлакан Михаил Игнатьев халăх хушшинче пулнă май тăтăшах çирĕппĕн калать: «Çитес ăнтăлу пĕтĕмĕшле пĕлỹ паракан шкулсен строительстви тавра пулĕ». 2020 çулччен республикăра çĕнĕ 30 шкул туса лартма палăртнă.«Пурне те çирĕп сывлăх, ырлăх, телей, ĕçре тата вĕренỹре, пултарулăхра тата спортра çĕнĕ çитĕнỹсем сунатăп!» - тенĕ район администрацийĕн пуçлăхĕ В.П.Фадеев хăйĕн саламлă сăмахне вĕçлесе.
РАЙОНТИ чи ватă та чи пысăк вĕренỹ учрежденийĕ - Шăмăршăри вăтам шкул 2015-2016 çулсенчи вĕренỹ тапхăрне пур енчен те тĕплĕн хатĕрленнипе, коллектив çĕнĕ тĕллевсене пурнăçлама хатĕр пулнипе кĕтсе илчĕ. Сентябрĕн 1-мĕшĕнчи илемлĕ ир Пĕлỹ кунĕ ячĕпе ирттернĕ савăнăçлă линейкăна 660 вĕренекен, çав шутра 11 класри 32вĕренекенпе пуçласа шкула килнĕ 74 ача йĕркеленсе тăрсан шкул картишĕ чечек тĕнчи пек туйăнчĕ. Уяв мероприятине шкул дирекцийĕ ĕмĕр асра юлмалла илемлĕ йĕркеленĕ. Шкул директорĕ В.В.Хорькова Пĕлỹ карапĕ ишеве тухни çинчен пĕлтерсен, чун-чĕрене хумхантарса Раççей Федерацийĕн тата Чăваш Республикин Патшалăх Гимнĕсем янăрарĕç. Вĕренекенсене саламлама хаклă хăнасем йышлă килнĕ. Район администрацийĕн пуçлăхĕн çумĕ В.А.Петьков, Чăваш Республикин çутçанталăк ресурсĕсемпе экологи министрĕн тивĕçĕсене вăхăтлăха пурнăçласа пыракан Е.В.Юшин, район администрацийĕн вĕрентỹ тата çамрăксен политики пайĕнчи информаципе методика центрĕн ертỹçи Э.С.Можаева, Патшалăх статистикин районти уйрăмĕн специалисчĕ С.Н.Низамова, Федерацин миграци службин управленийĕн районти уйрăмĕн тĕп специалисчĕ В.А.Калашникова тата ыттисем çамрăк ăрăва - пĕлỹ тĕнчине интереслĕ çулçỹреве тухма, учительсене, воспитательсемпе тренерсене - хавхаланулăхпа çирĕп сывлăх, ашшĕ-амăшне пысăк ăспа чăтăмлăх сунчĕç. Ачасен, ашшĕ-амăшĕн ятĕнчен А.Е.Матвеева хумхануллă сăмах каларĕ. Паллах, уяв парнесĕр пулмасть. Вĕренỹре тата общество ĕçĕнче, спортра малта пыракан вĕренекенсене Грамотăсемпе тата Дипломсемпе чысларĕç. В.А.Калашникова вара çĕршывăн çамрăк гражданĕсене чаплă лару-тăрура Раççей Федерацийĕн гражданинĕ пулнине çирĕплетекен паспортсем пачĕ. Шкул темле чаплă пулсан та, вĕрентỹпе воспитани ĕçĕнче яланах Вĕрентекен малти вырăнта пулĕ. Шкул коллективĕ савăнăçлă лару-тăрура 44 çул хушши ачасене спорта юратма вĕрентнĕ, çĕршыв тата республика шайĕллĕ спортсменсем хатĕрленĕ Чăваш Республикин тава тивĕçлĕ учительне Н.А.Куприянова тивĕçлĕ канăва ăсатрĕ.Чуна хумхантарса пĕрремĕш шăнкăрав янăрарĕ. Ăна 11 класра вĕренекен Кирилл Гришняковпа 1 класра вĕренме пуçлакан Ксения Мандрюкова шăнкăртаттарчĕç. Чи малтан - пĕрремĕшсем, вĕсем хыççăн ытти вĕренекенсем те кабинетсем тăрăх саланчĕç. Пĕрремĕш урок - Мир урокĕ пуçланчĕ.
И.САЛАНДАЕВ.
Сăнỹкерчĕксем - А.ЛАРШНИКОВАН.