02 сентября 2015 г.
Ĕçпе вăрçă тата право йĕркине сыхлакан органсен районти ветеранĕсен Канашĕн отчетпа суйлав конференцийĕ пулса иртнĕ. Унăн ĕçне районти ветерансен 31 пуçламăш организацийĕнчен суйланă делегатсемсĕр пуçне ветерансен юхăмĕнче хастар та активлă ĕçлекен, ял-йышра пысăк авторитетпа усă куракан çулланнă пенсионерсем те хутшăннă. Ĕçпе вăрçă ветеранĕсен конференцийĕнче ветерансен районти Канашĕ юлашки 5 çулта туса ирттернĕ ĕçсем çинчен унăн председателĕ П.Фомин отчетлă доклад туса панă. Конференци çакна палăртнă: ветерансен районти Канашĕ юлашки вăхăтра, уйрăмах Совет халăхĕ Тăван Çĕршывăн 1941-1945 çулсенчи Аслă вăрçинче чаплă Çĕнтерỹ тунăранпа 70 çул çитнине паллă тума хатĕрленнĕ тапхăрта хăйĕн ĕçне сисĕмлех лайăхлатнă. Ветерансен ялсенчи пуçламăш организацийĕсем ĕçпе вăрçă ветеранĕсен пурнăçпа йăла условийĕсене лайăхлатас, çамрăк ăрăва патриотизмла воспитани парас, ветерансене обществăлла ĕçсене явăçтарас, вĕсен сывлăхне упрас, усăллă канăвне йĕркелес тĕлĕшпе чылай ĕçсем туса ирттернĕ. Ку тĕлĕшпе Пуянкасси, Карапай Шăмăршă, Кивĕ Чукал, Анат Чаткас, Васан ялĕсенчи тата Шăмăршăри вăтам шкулти ветерансен пуçламăш организацийĕсем уйрăмах пуçаруллă пулнине, ветерансем çине пысăк тимлĕх уйăрнине палăртмалла. Ветерансен районти Канашĕ хăйĕн ĕç-хĕлне район тата ял тăрăхĕсен администрацийĕсемпе тỹрремĕнех тачă çыхăнса йĕркелесе пырать. Çавăн пекех ку тĕлĕшпе Канаша сывлăха сыхлакан, культурăпа çутĕç учрежденийĕсем те пысăк пулăшу параççĕ. Хальхи вăхăтра ĕçпе вăрçă ветеранĕсен районти Канашĕ пĕтĕмпе 2285 çынна пĕрлештерсе тăрать, вăл шутра Тăван Çĕршывăн Аслă вăрçине тỹрремĕнех хутшăннă 18 фронтовик, вăрçă çулĕсенчи ĕç фрончĕн 382 ветеранĕ, вăрçăра вилнĕ воинсен тăлăх 88 арăмĕ, 1479 ĕç ветеранĕ тата Чăваш Республикин 318 ĕç ветеранĕ пурăнать, пĕтĕмпе районта 4798 пенсионер шутланать. Доклада сỹтсе явма хутшăнса Шăмăршă ялĕнчи ветерансен пуçламăш организацийĕн председателĕ М.Захаров, ветерансен районти Канашĕн председателĕн çумĕ Ф.Кузнецова, шалти ĕçсен пайĕнчи ветерансен пуçламăш организацийĕн председателĕ Е.Сетриванов, Патирекри ветерансен пуçламăш организацийĕн председателĕ И.Мансуров, район администрацийĕн пуçлăхĕ В.Фадеев тухса калаçнă. Унтан делегатсем конференцин кун йĕркинчи ыйтусем тăрăх 15 çынран ветерансен районти Канашĕн çĕнĕ составне, çак йышран 5 çынран Канашăн Президиумне суйланă. Юлашкинчен ветерансен районти Канашĕн председателĕ пулмашкăн П.Фомина, унăн çумĕ пулмашкăн Ф.Кузнецована тата ветерансен республикăри отчетпа суйлав конференцине каймашкăн 2 делегат суйласа хăварнă.
П.ИВАНОВ.