Публикации » Тĕрлĕ ыйтусем тавра

23 сентября 2015 г.

Район администрацийĕн пуçлăхĕ В.Фадеев пайсемпе организацисен тата учрежденисен ертỹçисемпе черетлĕ канашлу ирттернĕ. Пĕрремĕш тĕп ыйту - социаллă сферăри тата пурăнмалли çурт-йĕрпе коммуналлă хуçалăх объекчĕсене хутса ăшăтмалли тапхăра мĕнлерех хатĕрленни. Район администрацийĕн пуçлăхĕн пĕрремĕш çумĕ - пурăнмалли çурт-йĕр хуçалăхĕпе строительство пайĕн ертỹçи В.Никифоров ку тĕлĕшпе ĕçсене 100 проценчĕпех пурнăçлани çинчен пĕлтернĕ. Районти тĕрлĕ харпăрлăхри хуçалăхсен хирĕсем те пушаннăпа пĕрех. Ялхуçалăхĕпе экологи пайĕн ертỹçи В.Алексеев каланă тăрăх, тĕштырăсене пухса кĕртесси вĕçленнĕ, 8291 гектар çинчен пĕтĕмпе 13471 тонна тырă çапса илнĕ. Вăтам тухăç - кашни гектартан 18 центнер патнелле. Çĕр ĕçченĕсем çĕрулмине те уяр çанталăкра кăларса пĕтересшĕн. Хальлĕхе ку ĕçе 192 гектар çинче пурнăçланă. «Иккĕмĕш çăкăрăн» вăтам тухăçĕ - гектар пуçне 168 центнер. Çĕр хатĕрлес ĕçсем те начар мар пыраççĕ темелле. Кăçал кĕр тыррине 3000 гектар акса хăварма палăртнă пулсан, çĕре пĕтĕмпех хатĕрлесе çитернĕ, кĕрхи культурăсене 2100 гектар акса хăварнă.

М.НИКОЛАЕВА.