23 сентября 2015 г.
Иртнĕ шăматкун Вăрманçăсен кунне халалласа Шăмăршăри Культурăпа кану центрĕнче савăнăçлă лару пулса иртнĕ. Унта вăрманçăсем хăйсен ĕçĕ-хĕлне пĕтĕмлетнĕ. Ĕçре палăрнисем, чи лайăххисем, тĕрлĕ наградăсене тивĕçнĕ. Хăйĕн сăмахĕнче Çутçанталăк ресурсĕсемпе экологи министрĕн çумĕ А.Яковлев вăрманçăсем хăйсен тивĕçне лайăх пурнăçласа пынине, вăрман отраслĕнче çитĕнỹсем пулнине палăртнă. Чи лайăх вăрман ĕçченĕсем "Раççейри вăрман пуянлăхне ỹстерес тата сыхлас ĕçре хастар ĕçленĕшĕн" паллăна, Вăрман хуçалăхĕн федераци агенствин, Чăваш Патшалăх Канашĕн грамотисемпе Тав çырăвĕсене, "Чăваш Республикин тава тивĕçлĕ вăрман ĕçченĕн хисеплĕ ятне тивĕçнĕ. Республикăри чи "ватă" лесничествосенчен пĕри - Шăмăршă лесничестви. Вăл йĕркеленнĕренпе - 90 çул. Çавна май коллектива укçа сертификачĕ парса хавхалантарнă. Вăрман ĕçченĕсене çавăн пекех Атăлçи федераци округĕнчи вăрман хуçалăхĕн Департаменчĕн ертỹçин çумĕ Н.Кузьмин, район администрацийĕн пуçлăхĕн çумĕ В.Денисов, Атăлçи вăрман тата çутçанталăк пуянлăхĕсемпе усă курас институт директорĕ Е.Онучин, "Чăваш вăрманĕ" наци паркĕн патшалăхăн тĕп инспекторĕ, Раççей Федерацийĕн Вăрман хуçалăхĕн хисеплĕ ĕçченĕ Н.Савельев саламланă. Уяв мероприятийĕ малалла Патăрьел райĕнĕнче тăсăлнă. Вăрманçăсем унта черетлĕ виççĕмĕш Спартакиадăра вăй виçнĕ.
Хамăр корр.