Публикации » Кĕрхи призыв пуçланчĕ

03 октября 2015 г.

Çар ретне кăçал пирĕн республикăри 1220 çамрăк тăрĕ.  Çар комиссариачĕн пай пуçлăхĕ Сергей Козюра полковник пĕлтернĕ тăрăх - вĕсем пурте медицина тĕрĕслевĕсем витĕр тухнă, пурне те «çар тивĕçне пурнăçлама юрăхлă» тесе йышăннă.  Салтак тумне тăхăнакансен пысăк пайĕ - аслă пĕлÿллĕ.  Çурхи призывра вĕсем 22 процент пулнă, хальхинче - 23 проценчĕ.  
Ентешсенчен ытларахăшĕ хĕсмете Тĕп çар округĕнче ирттерĕ. Кăнтăр тата Хĕвелтухăç çар округĕсенче çĕршыв чиккисене те хÿтĕлĕç. Кам ăçта пуласси çар специальноçĕн категорийĕнчен килет.Чăваш йĕкĕчĕсене сывлăш-десант тата космос çарĕсенче, ятарлă пĕлтерĕшлĕ чаçсенче те кĕтеççĕ. 
Хăйне майлă уйрăмлăх та пур кăçалхи призывăн. Канашри сбор пунктĕнче çамрăксене хăш çарта хĕсмете ирттерме тивнĕ тăрăх тÿрех çав тумпа тивĕçтереççĕ. Кашни призывник ячĕпе банк карточки (ПЭК) хатĕрленĕ, ăна вăл Канашран çула тухиччен илĕ. 
Чăваш каччисем чылай çул ĕнтĕ Мускавра, Президент полкĕнче хĕсметре тăраççĕ. Ноябрĕн 10-мĕшĕнче унта 10 çамрăка ăсатаççĕ.