26 сентября 2015 г.
Акци Шăмăршă районĕнчи полици пайĕн начальникĕпе йĕркеленĕ тĕлпулуран пуçланчĕ. Шăпăрлансем, Сергей Агеева буклет парнеленĕ май, хăйсем мĕн тĕллевпе килни çинчен пĕлтерчĕç. Малалла вара пĕчĕк агитаторсем полици инспекторĕпе Денис Кудряшовпа пĕрле çуран çÿрекенсен çул урлă каçнă чух усă куракан правилисем çинчен водительсене те аса илтерчĕç. Çавăн пекех ачасем çул çинче хирĕç пулакан çуран çынсене те, машинăпа иртсе пыракан водительсене те, унта ларса çÿрекенсене те хăрушсăрлăх темипе хатĕрленĕ буклетсем валеçсе тухрĕç. Унти информаци хуть камшăн та усăллă пуласса шанчĕç.
Кунсăр пуçне асăннă ача садĕнче ĕçлекенсем, çак тĕллевлĕ акципе килĕшÿллĕн, татах та мероприятисем туса ирттересшĕн. Паллах, ашшĕ-амăшĕсен те çул çинчи ачасен хăрушсăрлăхĕшĕн пайтах ĕçлемелле. Пĕчĕккисем те, аслисем те пĕрле тăрăшсан çеç ачасем тĕрĕс-тĕкел пулĕç.
Л.САБАНОВА,
«Сказка» ача сачĕн заведующийĕ.