30 сентября 2015 г.
Уяв Шупашкарта ачасемпе çамрăксен пултарулăх Керменĕнче иртнĕ. Кунта 17 районтан 19 ачасен ĕç бригади пуçтарăннă. Вĕсем пĕр-пĕрин паха ĕç опычĕпе паллашнă, тĕрлĕ конкурссене хутшăннă. Ăмăртусем питĕ çивĕч иртнĕ: районсенчен чи хастаррисем çĕнтерсе килнĕ-çке!
Фестиваль ĕçне вĕрентÿпе çамрăксен политикин министрĕн çумĕ С.Кудряшов хутшăннă. Вăл çамрăксене фестивале пухăннă ятпа саламланă, тупăшусенче ăнăçусем суннă. Ачасен çу каçипе тăрăшса ĕçленĕ çитĕнĕвĕсемпе ятарлă курав паллаштарнă. Çавăн пекех уява 18 станци тăрăх йĕркеленĕ вăйă та илемлетсе тăнă.
Мероприяти ĕç бригадисем хăйсен пултарулăхне кăтартнипе вĕçленнĕ. Кунта Шăмăршăри вăтам шкулăн ĕç бригади те тивĕçлĕ хатĕрленни палăрнă. Сăмахран, «Выставка (курав) стенчĕ» тата «Творчествăлла паллаштарни (презентаци)» номинацисенче ачасем иккĕмĕш вырăн йышăннă.
В.КУЗЬМИНА.