17 октября 2015 г.
ИРТНĔ кĕçнерникун районти культура учрежденийĕсенче Пĕтĕм тĕнчери Ял хĕрарăмĕсен кунне халалланă меропри- ятисем пулса иртнĕ. Çак кун централизациленĕ библиотека тата централизациленĕ клуб тытăмĕсенчи хĕрарăмсем хушшинче шашкăпа шахмат турнирĕ пулса иртнĕ, унта Ольга Присмотрова, Ирина Морозова, Валентина Львова, Татьяна Давыдова, Антонина Нефедова, Людмила Давыдова хутшăннă. Икĕ команда та хаклă парнесене тивĕçнĕ. Çакнашкал мероприятисем Кивĕ Шăмăршăра, Палтиелĕнче те пулса иртнĕ. Кивĕ Чукалта хĕрарăмсене ял тăрăхĕн пуçлăхĕн тивĕçĕсене вăхăтлăха пурнăçлакан Н.Кувайская саламланă. Ун хыççăн - концерт: хаваслă юрă-ташă. Васанта вара ял хĕрарăмĕсене уявпа ял тăрăхĕн пуçлăхĕ Ю.Ильин, районти хĕрарăмсен организацийĕн Канашĕн ертỹçи, районти больницăн тĕп врачĕ И.Смирнова, район администрацийĕн вĕрентỹпе çамрăксен политикин пайĕн ертỹçи Н.Ендиеров, ял тăрăхĕн депутатсен Пухăвĕн депутачĕ Г.Ларшников саламланă. Тĕлĕнмелле лайăх иртнĕ уяв, программăна Алина Петровапа Николай Ендиеров питĕ ăнăçлă ертсе пынă. Хĕрарăмсене çавăн пекех музыка шкулĕн преподавателĕсем Т.Яковлева тата С.Кудряшова хăйсен пултарулăхĕпе савăнтарнă. Чăваш Республикин Культурăн тава тивĕçлĕ ĕçченĕ Г.Ларшников хуткупăса «калаçтарма» тытăнсан никам та вырăнта чăтса ларайман - такмаксем шăраннă май ташлас текенсен шучĕ те ỹссех пынă.
В.МИХАЙЛОВ.