21 октября 2015 г.
Çак поэта пĕлмен çын пирĕн хушăра çуках. Вăл çырнă сăвăсене пăхмасăр вĕренсен нихăçан та манаймастăн. «Жди меня», «Сын артиллериста», «Ты помнишь, Алеша, дороги Смоленщины...» сăвăсен йĕркисем кашнинех хумхантараççĕ, хаяр вăрçă çулĕсене уçăмлăн курма май параççĕ. Çар çыннисемшĕн «Жди меня» сăвă уйрăмах çывăх. Ку сăвă Тăван çĕршыва тăшмансенчен сыхлама та хистет, савнă çынна тỹсĕмлĕ кĕтсе илме те пулăшать. Çавăнпа пуль çар тивĕçне пурнăçлакан салтаксем ăна халĕ те питĕ килĕштереççĕ.Шăмăршăри вăтам шкулта вырăс чĕлхипе литературине вĕрентекен Н.Петровапа З.Латыпова 11-мĕш класра вĕренекенсемпе К.Симонов юбилейне халалланă ятарлă урок ирттернĕ. Урок пĕлтерĕшне К.Маловпа В.Алексеева вĕренекенсем поэт кун-çулĕ тăрăх хатĕрленĕ презентаци пысăк витĕм кỹнĕ. Унта сăвăсен авторĕн вăрçă çулĕсем те, каярахри творчествăпа çыхăннă ĕçĕ-хĕлĕ те туллин сăнланнă. «Жди меня» сăвва поэт Тăван çĕршы-вăн Аслă вăрçи пуçланнă çул çырнă, çав çулах вăл кашни салтакăн юратнă сăвви пулса тăнă. Ку сăвă йĕркисем фронтра, çапăçу хирĕнче çуралнă. Ăна автор радиопа 1941-мĕш çулхи декабрĕн 9-мĕшĕнче вуланă. Урокра вĕренекенсем асăннă хайлава К.Симонов хăй сассипе вуланине итленĕ.Çавăн пекех шкул ачисем те поэтăн сăввисене пăхмасăр каланă. Ч.Ахметова «Когда на выжженном плато...», А.Рубцов – «Родина» сăвăсене чуна пырса тивмелле вуланă. Вăрçăра хăрушлăх, пурнăçпа вилĕм кĕрешеççĕ, çĕнтерỹшĕн çĕр юнпа пĕвенет... Паллах, паян пурăнакансен Çĕнтерĕве туптанă геройсене нихăçан та манмалла мар...Литература урокĕ ачасене тарăн шухăша янă, асра юлнă.
Г.ИВАНОВА.