28 октября 2015 г.
РАÇÇЕЙ Федерацийĕн Президенчĕн «Раççей Федерацийĕн гражданĕсене 2015 çулхи октябрь-декабрь уйăхĕсенче çар ретне илесси çинчен» Хушăвĕпе килĕшỹллĕн, октябрĕн 1-мĕшĕнчен пуçласа кĕрхи призыв пуçланчĕ.Кăçал çар ретне пирĕн республикăри 1220 çамрăк тăрĕ, çав шутра Шăмăршă районĕнчен – 25. Çуркуннехи призывпа 24 яш çар тумĕ тăхăннăччĕ.Хальхи призыв ыттисенчен самаях уйрăлса тăрать. Пулас салтаксене службăна тухса каяс умĕн хăйĕн çинчен пĕлтерекен электронлă картăпа тата кашни уйăхра укçа куçарса тăма банк картипе тивĕçтереççĕ. Çавăн пекех пуçласа кашни призывнике çул çине 18 япаларан тăракан несессер парса яраççĕ. Кунта шăл тасатмалли паста, щетка, расческа, çăвăнмалли тата хырăнмалли хатĕрсем тата ытти те. Тата тепĕр çĕнĕлĕх. Кăçалтан салтаксем, служба вĕçленсен, ĕç укçин икĕ оклад виçи чухлĕ укçа илеççĕ. Енчен те салтак тăлăх пулсан, ăна 5 оклад виçи чухлĕ пособи параççĕ. Аслă пĕлỹ илнĕ призывниксен çакăн пек ирĕк пур: вăл е 12 уйăх пуринпе те пĕрле, е 2 çул контракт майĕпе службăра тăма пултарать. Аслă шкулсенче талантлăхĕпе палăрнă студентсем вара вĕренсе пĕтерсен, кăмăлĕсем пулсан, наука ротине çырăнма пултараççĕ.Халĕ йĕкĕтсем çара хăйсен ирĕкĕпех каяççĕ. Çар тивĕçне пурнăçлассинчен пăрăнса çỹрекенсен шучĕ çулсерен чаксах пырать. Вĕсене çапла асăрхаттарса калас килет: малашне çар тумне тăхăнса курман сывлăхлă çамрăксене патшалăх тата хăй тытăмлăх структурисене ĕçе вырнаçма çăмăлах пулмĕ. Чăваш Республикин çар комиссариачĕн телефонĕсем 8 (8352) 62-12-67, 8 (83533) 4-15-81 тунтикунран эрнекунччен кунĕпех - 8 сехетрен пуçласа 17 сехетчен - сирĕн шăнкăравсене йышăнаççĕ. Призывниксемпе вĕсен ашшĕ-амăшĕсем хăйсене интереслентерекен ыйтусем çине хурав илме пултараççĕ. Призывпа çыхăннă ыйтусем сиксе тухсан вырăнти Патăрьелпе Шăмăршă райо- нĕсенчи çар комиссариатне çак номерсемпе шăнкăравлама пулать: 8 (83532) 6-12-51 - пай пуçлăхĕ;8 (83532) 6-12-52 – призыв отделенийĕ.
П.ИВАНОВ,Патăрьел тата Шăмăршă районĕсен çар комиссариачĕн пай пуçлăхĕ.