31 октября 2015 г.
Кунта аслă ăрури 4 хĕрарăм (ват çын тесе калаймăн!) асанне-кукамайсен конкурсĕнче ăмăртрĕç. Ăçта кăна пултармаççĕ-ши пирĕн юратнă кукамайсемпе асаннесем! Вĕсен ĕçчен аллисем тутлă апат-çимĕç пĕçерме те, алĕç тума та, кил-çуртра тирпей-илем тытса тăма та ĕлкĕреççĕ. Мăнукĕсене вĕсем пек сăпка юррипе çывăрттарма кам пĕлтĕр тата? Юрра-ташша та ăста вĕсем. Çаксене веçех уяв конкурсĕнче куртăмăр. Чи çамрăк кукамай – Анат Чаткас ялĕнчи Людмила Юнкерова. Унăн Ева мăнукĕçур çулта çеç-ха. Людмила Федоровна, шкулта ачасене вĕрентекен пулнăран-ши, «Затейница» конкурсра палăрчĕ. Карапай Шăмăршăри Светлана Сидорова – 4 пепкен асламăшĕ - «Алĕç ăсти» ята тивĕçрĕ – тĕрĕсемпе тĕлĕнтерчĕ. Ку тĕлĕшпе вăл мăнукĕсемшĕн те тĕслĕх пуласси пĕрре те иккĕлентермест. Нина Мамонтова (Карапай Шăмăршă), 3 мăнукĕн асламăшĕ, чăн-чăн повар-кулинар пулнине çирĕплетрĕ. Мăн асанне-кукамай, Кивĕ Шăмăршă ялĕнчи Нина Ларшникова çывăх вăхăтрах 75 çулхи юбилейне паллă тăвать – 5 ача, 12 мăнук, 6 кĕçĕн мăнук тăсаççĕ унăн йăхне! Юрлас ăсталăхĕ халĕ те чакмасть-ха - «Сăри кăпăклă» халăх юррипе пурне те тыткăнларĕ. Сăра та хăех вĕретсе килнĕ. «Ылтăн сасă» конкурс çĕнтерỹçи тесе палăртрĕ ăна жюри. Хисеплĕ асаннесемпе кукамайсене мăнукĕсем саламларĕç, районти хĕрарăмсен Канашĕн председателĕ Ирина Смирнова Хисеп грамотисем парса чысларĕ. Ял тăрăхĕн ертỹçисем вара вĕсене хаклă парнесемпе хавхалантарчĕç.
Г.ИВАНОВА.