04 ноября 2015 г.
Мероприяти «Чебоксары Арена» Пăр керменĕнче иртнĕ.Район администрацийĕн пуçлăхĕ Владимир Денисов ертсе пыракан делегацинче ялхуçалăх предприятийĕсен ертỹçисемпе ĕçре малта пыракансем пулнă. Шăмăршă районĕ те, ытти районсем пекех, ялхуçалăх çитĕнĕвĕсен куравне хутшăннă. Пахча-çимĕçсĕр пуçне район ĕçĕ-хĕлĕпе паллаштаракан стенд та тăратнă – çитĕнỹсем пĕтĕмпех цифрăсенче, танлаштарусем урлă уçăмлăн курăннă. Кунтах Пуянкассинчи «Аххаяс» фольклор коллективĕ курава пынисене чăваш халăх юрри-кĕввисемпе хавхалантарса тăнă.Республикăри ялхуçалăх ĕçченĕсене уяв ячĕпе Чăваш Ен Пуçлăхĕ Михаил Игнатьев, Раççей Федерацийĕн Пухăвĕн Федераци Канашĕн членĕ Вадим Николаев, Раççей Федерацийĕн Ял хуçалăхĕн министерствин выльăх-чĕрлĕх тата ăратлăх департаменчĕн директорĕ Владимир Лабинов, Пĕтĕм Раççейĕн «Единая Россия» политика партийĕн Чăваш Республикинчи уйрăмĕн секретарĕ Николай Малов саламланă.Хăйĕн докладĕнче ял хуçалăх отраслĕнчи паллă çул-йĕрсемпе Чăваш Республикин ял хуçалăх министрĕ Сергей Артамонов паллаштарнă.Çавăн пекех чаплă ларура ĕçре малта пыракансене чысланă. Чи пысăк парне вара çамрăк фигуристсен шоу-представленийĕ тата «Золотое кольцо» ансамблĕн солистки, Раççей халăх артистки Надежда Кадышева шăрантарнă юрăсем пулнă.
В.АЛЕКСЕЕВ.