14 ноября 2015 г.
Ку ĕçе муниципал контракчĕпе килĕшỹллĕн пурнăçланă. 23 çемьене (50 çын) валли Шăмăршăри Космовский урамĕнче муниципаллă контракт тăрăх пĕтĕмпе 727,1 тăваткал метр пурăнмалли çурт-йĕр условийĕсемпе тивĕçтернĕ. Халĕ çĕнĕ хваттерсене пурăнма куçакансене алăксен уççине парас ĕç пырать. Çынсене кивелнĕ тата авариллĕ çуртсенчен куçарас (пĕтĕмпе 1036,69 тăваткал метр) тĕлĕшпе Шăмăршăри Ленин урамĕнчи 25, 41, 56, Советская урамĕнчи 2-мĕш çуртсене пăсма палăртнă. Чăваш Республикин 2013-2017 çулсенче çынсене юхăннă тата авариллĕ çуртсенчен куçармалли программăпа килĕшỹллĕн 2015 çул тĕлне 40 çемьене (99 çын) пурăнмалли 1397,7 тăваткал метр лаптăкпа тивĕçтернĕ. Тепĕр çивĕч ыйту - нумай ачаллă çемьесене çĕр участокĕсемпе тивĕçтересси. Ку тĕлĕшпе те районта ĕç начар мар пырать темелле. Нумай ачаллă çемьесем районта 237 шутланаççĕ, вĕсенчен 86-шĕ çĕр илмелли черетре тăраççĕ. Çĕрпе тивĕçтерме районта 92 участок (14,3 гектар) уйăрнă. Хальлĕхе нумай ачаллă çемьесене 86 çĕр участокĕ уйăрса панă. Çак шутран пилĕк çемьене - çурт-йĕр çавăрма, 58 çемьене - килти хушма хуçалăха аталантарма. Уйăрса панă çичĕ участока элек- троэнергипе тата газпа тивĕçтернĕ, икĕ участокра асфальтлă çул сарнă.
В.НИКОЛАЕВ.