18 ноября 2015 г.
ИРТЕТ çав вăхăт - çул хыççăн çул хыçа юлать. Çакнашкал çав шăпа тени. - 85 çулах çитрĕм-ши вара? - тĕлĕнет Асанкассинчи Е.Судукова. - Темиçе çул каярах кăна çамрăкччĕ, куллен ĕçе çỹреттĕм. Пĕрре те ватăлас килместчĕ те... Вăхăт вара хăйĕннех илет. Çак ялтах çуралса ỹснĕ Екатерина Осиповна. Пыл та çу теме çук унăн пурнăçне. Хĕрача вунтăваттăрах фермăра ĕçлеме тытăннă, «вăтăр пилĕк çул «Аврора» колхозра ĕне сунă. Çăмăл пулнă-и çамрăк хĕре? Çук пулĕ. Ветеран вара çав çулсене аса илесшĕнех мар. - Пĕччен ĕçлемен вĕт. Ыттисенчен те кая юлман. Аслăраххисем хавхалантарса, вĕрентсе пыратчĕç, - аса илет халĕ Е.Судукова. - Ĕç кăтартăвĕсем ỹссе пыни чуна савăнтаратчĕ. Колхоз правленийĕ те хавхалантарсах тăратчĕ. Шăпа тени пуриншĕн те пĕрешкел мар. Екатерина Осиповнан Валентин ывăлне пĕчченех ỹстерсе çитĕнтерме тивнĕ. Акнă пĕрчĕ вара тымар ярса вăй илет - пыра-киле Валентин колхозри чи лайăх механизаторсенчен пĕри пулса тăрать. Нумай çул «хурçă ут» рулĕ умĕнчен уйрăлман вăл. Ĕçне кура хисепĕ теççĕ. Е.Судукована ял Совечĕн депутачĕ пулма та суйланă. Вăл суйлавçăсен шанăçне яланах тỹрре кăларма тăрăшнă - халăх тарçи вĕт. - Пурăнасчĕ-ха, - тет тылпа ĕç ветеранĕ. - Виçĕ мăнук манăн, вĕсен ачисем - пиллĕкĕн. Çакăнтан пысăк савăнăç урăхран мĕн пултăр! Паллах, юбилей палăрăмсăр иртмест. Паллă кун ячĕпе Екатерина Осиповнана йăмăкĕ Анна Осиповна, ывăлĕпе кинĕ, мăнукĕсемпе çывăх тăванĕсем ăшшăн саламлĕç. В.НИКОЛАЕВ.