25 ноября 2015 г.
Вăл «Помоги пчеле» ятпа иртрĕ. Юлашки çулсенче вĕлле хурчĕсем усракансем, уйрăмах 10 çултан сахалтарах тытакансем, йывăрлăхсене çĕнтерсе пырайман пирки тухăç кирлĕ таран илейменнисен йышĕ ỹссех пыра пуçларĕ. Çавна шута илсе форум ятне «Помоги пчеле» ят патăмăр. Пирĕн районти специалистсен тĕп тĕллевĕ - хурт-хăмăрçăсене аталанма пулăшса пымалла. Çавăнпа Чăваш Республикин пĕрремĕш форумне Рязань облаçĕнчи Рыбное хулинче вырнаçнă хурт-хăмăр Академинчен виçĕ çын хутшăнчĕç: А.Савин - ГНУ НИИ хурт-хăмăр Наукăпа тĕпчев институчĕн профессорĕ; Н.Попова - хурт-хăмăр академийĕн доценчĕ; К.Богомолов - «Аписфера-М» ертỹçи. Çакнашкалли, асăннă заведенинчен вĕрентме килни халиччен пулман. Вĕсем пире хурт-хăмăр аталантарас енĕпе мĕнле ĕçсем туса пымаллине, пыл паракан çĕнĕ йышши курăксем акас енĕпе, чир-чĕрсенчен çĕнĕ эмельсемпе сиплес, ăратлăх енĕпе çĕнĕ технологипе ĕçлемелли çинчен нумай çĕнĕлĕхсем уçса пачĕç. Пĕрремĕш форумра Чăваш Республикин ял хуçалăх министерствинчен Н.Якимов, И.Мадебейкин профессор хутшăнчĕç. Г.Максимов, ялхуçалăх наукисен кандидачĕ, паянхи кун хурт-хăмăр усракансен умĕнче мĕнле йывăрлăхсем пулни çинчен, çавăн пекех çак йывăрлăхсене çĕнтерме мĕнле ĕçсем туса пыни пирки палăртса хăварчĕ. Республикăра 60 000 вĕлле шутланса тăрать, терĕ вăл. Кăнтăр районсемпе ĕçлекен зоотехник-утарçă вара пирĕн тăрăхра юлашки çулсенче ăратлă среднерусски вĕлле хурчĕсем ĕрчетес енĕпе ăнăçлă ĕçлесе пыни çинчен каласа пачĕ, кăçал Пермь облаçĕнчен илсе килни çинчен пĕлтерчĕ. Унччен Пушкăрт Республикинчи заповедникран тата Тутар Республикинчен илсе килнĕ пулнă. Пирĕн тăрăхра çак палăртнă ăратлă вĕлле хурчĕсем районланă ăрат шутланса тăраççĕ. И.Филиппов врач- офтальмолог Ульяновск хулинчен унчченхи çуллахи семинар-канашлăва Патăрьел районне килнĕччĕ. Нумай хурт- хăмăрçăсем ыйтнипе тепĕр хут чĕнсе ятăмăр, вăл татах та килсе ăнлантарса пама килĕшрĕ. Доклад ячĕ «Безгранич- ная живительная и исцеляющая сила пчелы». Юлашки вăхăтра нумай чирлĕ çынсем хурт-хăмăр паракан продукципе сипленме пуçларĕç, терĕ вăл хăйĕн калаçăвĕнче. Чăваш Республикинчи хурт- хăмăрçăсен пĕрремĕш форумĕ усăллă иртрĕ. Эппин, çитес çул пыллă пулăпăр. Шанас килет тем пекехчĕ.
Н.ПИРОЖКОВ, Чăваш Республикин ял хуçалăхĕн тава тивĕçлĕ ĕçченĕ.