28 ноября 2015 г.
Мăшăрланнă хыççăн 4 çул пĕр-пĕринчен аякра пурăнма тивнĕ – Петр çар службинче тăнă вăхăтра. Урăхран тек нимĕн те уйăрайман çамрăк мăшăра – яланах пĕр сукмакпа, пĕр туслă çемьере. Йывăрлăхсене те, савăнăçне те пĕрле пайласа, пĕр-пĕрне ăнланса, пулăшса çак çула çитнĕ вĕсем. Çулран çул çемье тĕрекленсех, вăйлансах пырать. Ахальтен мар 65 çулхи юбилее тимĕр юбилей теççĕ – туйăмсем, шанчăклăх, кăмăл çирĕплĕхĕ – тимĕр пек чăтăмлă. Вăрçă çулĕсенче иртнĕ вĕсен ачалăхĕ, пĕчĕкренех ĕçе хăнăхса ỹснĕ вĕсем. Тăватă ачине те ĕçе юратма, пурнăçра сăпай, тирпейлĕ пулма вĕрентнĕ. Хăйсем те халĕ те ĕçсĕр лараймаççĕ. Петр Прокопьевич - ялти ăста платник, йывăçран каскалама юратать. Мăшăрĕ кил-çуртра тăрмашать: пỹрт-çурт тирпейлет, апат-çимĕç хатĕрлет. Унсăр пуçне çу кунĕсенче вăй çитнĕ таран пахчара ĕçлеççĕ ватăсем, чăх-чĕп, хур-кăвакал, сурăхсем усраççĕ. Юлия Александровна 40 çул ытла почтальонка пулса тăрăшнă – йĕпе-сапана, çил-тăмана пăхмасăр килрен киле хаçат-журнал вăхăтра валеçнĕ. Уявсенче вара Петр Прокопьевич тăван-хурăнташне купăс каласа савăнтарнă – ялта ăста купăсçă шутланнă. Туслă çемьене тимĕр туй ячĕпе район администрацийĕн пуçлăхĕ Владимир Денисов, ял тăрăхĕн ертỹçи Вячеслав Яковлев тата ЗАГС пайĕн заведующийĕ Татьяна Матвеева саламларĕç, асăнмалăх парнесем, чечек çыххисем парнелерĕç. Юбилярсене çавăн пекех йышлă çемйи – 4 ачи, 10 мăнукĕ, 11 кĕçĕн мăнукĕ - чун-чĕререн тав сăмахĕсем каларĕç, ырлăх-сывлăх сунчĕç. Татах та юбилейсем кĕтсе илме çирĕп сывлăх, хавас кăмăл пултăрччĕ сирĕн, хисеплĕ ĕç ветеранĕсем!
М.ЕФИМОВА.