02 декабря 2015 г.
Кун йĕркинче 5 ыйту тăнă. Пĕрремĕш ыйтупа администрацин экономика пайĕн пуçлăхĕн тивĕçĕсене вăхăтлăх пурнăçлакан Т.Татарских тухса калаçнă, районти предприятисемпе организацисен ĕçĕ-хĕлĕпе паллаштарнă. Агропромышленноç комплексĕн 10 уйăхри аталанăвĕ çинчен В.Алексеев пĕлтернĕ. Юлашки 3 çул хушшинче акăнакан çĕр лаптăкĕ хресчен (фермер) хуçалăхĕсене пула ỹсни палăрать, кăçал вăл пĕлтĕрхинчен 364 гектар пысăкрах. Мĕнпур усă куракан çĕр лаптăкĕ 19579 гектара çитнĕ. Çанталăк чăрмавсем кỹнине пула пухса илнĕ пĕтĕм тырпул тухăçĕ, уйрăмах пĕрчĕллĕ йышшисем, кăçал планпа палăртнинчен пĕчĕкрех. Ялхуçалăх культурисем 3435 гектар çĕр çинче сиенленнĕ. Пĕрчĕллĕ тата пăрçа йышши культурăсен тухăçĕ 16,6 центнерпа (пĕлтĕр - 19,9) танлашнă. Çĕрулмине 33,4 пин тонна кăларса илнĕ. Ку вăл пĕлтĕрхинчен 44 процент нумайрах. Пахчаçимĕç пурĕ 3,6 пин тонна пуçтарса илнĕ, ку кăтарту та пĕлтĕрхинчен 12 процент пысăкрах. 2016 çулта çурхи пĕрчĕллĕ тата пăрçа йышши культурăсене 9437 гектар çинче акма палăртнă. Ака ĕçĕсене ирттерме 2079 тонна вăрлăх хатĕрленĕ те ĕнтĕ. Кĕрхи суха ĕçĕсене те 6300 гектар çинче туса ирттернĕ. Хальхи вăхăтра чи çивĕч ыйтусенчен пĕри - акма юрăхлă çĕрсемпе туллин усă курасси. Виççĕмĕш ыйту – пушар тухас хăрушлăхпа кĕрешесси. Кун пирки А.Кляжев тухса калаçнă. Кăçалхи ноябрĕн 28-мĕшĕ тĕлне районта 18 пушар тухнă (пĕлтĕр – 15). Пушарсем кăçал хуçалăхсене 5243902 тенкĕлĕх сиен кỹнĕ – пĕлтĕрхинчен 2,2 хут ытларах. Юрать-ха, вут-кăвара пула çынсен пурнăçĕ татăлман (пĕлтĕр 2 çын вилнĕ). Пушар сăлтавĕсем çаксем: - электрооборудованисене йăнăш çыхăнтарни тата тĕрĕс мар усă курни – 11 тĕслĕх; - вут чĕртни – 1 тĕслĕх; - кăмакапа усă курнă чухне хăрушсăрлăх правилисене пăхăнманни – 2 тĕслĕх; - вут-кăварпа асăрханусăр пулни – 2 тĕслĕх; - ача-пăча вут-кăварпа ашкăнни – 2 тĕслĕх. Раççей Федерацийĕн Шăмăршă районĕнчи «Батыревский» полици уйрăмĕн начальникĕ С.Агеев оперативлă службăн 10 уйăхри ĕçĕ-хĕлĕ çинчен пĕлтернĕ. Пĕлтĕрхипе танлаштарсан, районта обществăлла вырăнсенче преступлени тăвасси 8,7 процент, урамри йĕркесĕрлĕхсен шучĕ 57,1 процент ỹснĕ. Çак çитменлĕхсене пĕтерме тивĕçлĕ мероприятисем ирттерме йышăннă. Çавăн пекех администраци пуçлăхĕн çумĕ тата социаллă аталану пайĕн ертỹçи В.Петьков та тухса калаçнă – 2016 çулхи 1 - мĕш çурçулшăн çырăнтару ĕçĕ епле пыни çинчен пĕлтернĕ.
М.ЮМАНОВА.