12 декабря 2015 г.
Тĕрлĕ енлĕ ăста Лев Николаевич - пуçланă ĕçе вĕçне çитеретех. Кăçатă йăвалама уйрăмах ăста Лев Николаевич. Кашни çулах вĕсене 50-60 мăшăртан кая мар хатĕрлет. Ыйтакансем вара нумайăн - камăн хĕл сиввинче урисене шăнтас килтĕр? Йывăçа ĕçе кĕртес енĕпе те маçтăр Л.Сарандаев. Урам тăрăх утса тухрăмăр та, унăн килĕ умĕнчи пусă пеккине урăх кураймарăмăр. Пăхса ытармалла мар вĕт - чăн-чăн илемлĕх тĕслĕхĕ. - Пĕрре те ахаль ларас килмест, - тет Лев Николаевич. - Çынсемшĕн, ялшăн мĕн-тĕр ырă ĕçсем тăвасчĕ. Ку тĕлĕшпе ăна ырламалли, мухтамалли çук мар. Çук, никам та хушман, хистемен ăна - вăл хăйĕн килĕ умĕнче ача-пăча лаптăкне йĕркеленĕ. Халĕ çатан карта тытма пĕлекенсем пур-ши? Çук пулсан Çĕнĕ Чукала çитме тăрăшăр, Л.Сарандаевăн урамри аттракционĕсемпе паллашăр. - Çăвĕпех ача-пăча татăлмасть çакăнтан. Пăхса тăратăп та - чун савăнать, тата мĕн те пулин çĕннине тăвас килет, - тет мал ĕмĕтлĕ ăста. Лев Николаевичăн тепĕр иленĕвĕ – пыл хурчĕсем. Вĕллесем самаях унăн. Вĕсен шучĕ миçине ыйтсан, вăл аллине кăна сулчĕ. Тен тĕрĕс те пулĕ: кун пирки утарçăсем питех калаçса каймаççĕ.
Хамăр корр.