13 января 2016 г.
Январĕн 4-мĕшĕнче Чăваш Енре Раççей МЧСĕн пуçлăхĕ Владимир Пучков ĕçлĕ визитпа пулнă. Визитăн тĕп тĕллевĕ - регионăн çăлав службисем хĕллехи тапхăрти ĕçсене: автомобиль трассисем çинче пысăк «пăкăсем» вăхăтĕнче води- тельсене пулăшасси, ЖКХ объекчĕсенчи пысăк аварисен сиенне пĕтересси - пурнăçлама хатĕррипе хатĕр маррине тĕрĕслесси. Владимир Пучков чăваш çăлавçисен аэромобильлĕ ушкăнĕн вăйĕсемпе хатĕрĕсене пăхса çаврăннă. Малта пыракан çак отряд 100 çынран тăрать, хальхи йышши техникăпа тата оборудованипе усă кураканскер авари-çăлав мероприятийĕсене питĕ хăвăрт ирттерме пултарать, çав шутрах - хирти условисенче те. Чăваш Ен Пуçлăхĕ Михаил Игнатьев Раççей МЧСĕн пуçлăхне регионри службăсемпе ведомствăсем пĕр-пĕринпе çыхăнса ăнăçлă ĕçлени, çынсен сĕнĕвĕсемпе асăрхаттарăвĕсене вăхăтра шута илни Чăваш Енре тăнăçлă лару-тăрăва сыхласа хăварма май панине пĕлтернĕ. Авариллĕ лару-тăрăва вăхăтрасирнине палăртнă. Раççей МЧСĕн тĕп аппарачĕн делегацийĕ çавăн пекех Шупашкарти 6-мĕш пушар-çăлав чаçне çитсе курнă: çăлавçăсемпе пушарнăйсен ĕç условийĕсемпе паллашнă. Вĕсем усă куракан техникăпа оборудованисене тĕрĕсленĕ. Владмир Пучков 6-мĕш пушар-çăлав чаçĕн йышĕ синкерсене сирме тата кăткăс лару-тăрура тĕллевĕсене пурнăçлама яланах хатĕр пулнине палăртнă. РФ граждан оборонин, чрезвычайлă лару-тăру тата синкерсен сиенĕсене пĕтерес ĕçĕсен министрĕ журналистсен ыйтăвĕсене хуравланă май Раççей çăлавçисене тĕнчери чи лайăххисем тесе йышăннине пĕлтернĕ. Çĕнĕ çулпа çыхăннă уявсенче хăйсем çине тăрсах ĕçленине каланă, оперативлă службăсем пулăшу кирлĕ çынсене инкекре пĕччен хăварманнине систернĕ. Владимир Пучков çынсем талăкĕпех пулакан-пурăнакан вырăнсене, çавăн пекех çулсемпе федераци трассисене куçран вĕçертмелле мар тенĕ. «Раççей МЧСĕн подразделенийĕсен тата çул-йĕр службисен çулсемпе трассăсем çинче пулакан пăтăрмахсене вăхăтра сирмелле, инкеке лекнисене май килнĕ таран хăвăртрах пулăшмалла», сĕннĕ Чрезвычайлă ведомство ертỹçи. Раççей МЧСĕн пуçлăхĕ Чăваш Республикинчи чрезвычайлă лару-тăрăва асăрхаттарас тата сирсе ярас енĕпе ĕçлекен тытăма пысăк хак панă, унăн ĕçне тивĕçлипе йĕркелесе пынăшăн Чăваш Ен Пуçлăхне Михаил Игнатьева тав тунă.
И.КЛЕМЕНТЬЕВА.