Публикации » Карапай Шăмăршăри вăтам шкул - Раççей конкурсĕн лауреачĕ

13 января 2016 г.

Шкулсене конкурсра чăн малтан вĕренỹ кăтартăвĕсене тĕпе хурса хакланă. Шкул ачисен тата вĕрентекенсен юлашки 5 çул хушшинче тунă çитĕнĕвĕсене те шута илнĕ. Çак конкурса пуçарса яракансем - Федераци Канашĕн тата Раççей Федерацийĕн Патшалăх Канашĕн Федераллă Пухăвĕн комитечĕсем, Раççейăн шкул директорĕсен тата учителĕсен Ассоциацийĕ, Пĕтĕм тĕнчери пахалăхпа маркетинг академийĕ. Конкурса вĕрентỹ учрежденийĕсен паха опытне çĕклес тата анлă сарас тĕллевпе ирттереççĕ. Сумлăран та сумлă жюри Карапай Шăмăршăри вăтам шкула çĕршыври 100 чи лайăх шкулсен шутне кĕртни, ылтăн медальпе чыслани тата шкул директорне «2015-мĕш çулăн директорĕ» ят пани пире, паллах, питĕ савăнтарать. Шкул коллективне тата унăн пултаруллă ертỹçине Юрий Федорович Ермолаева çак пысăк наградăсене илнĕ ятпа хĕрỹллĕ саламлатпăр, малашне те вĕрентỹпе воспитани ĕçĕнче татах та çĕнĕ çитĕнỹсем тума ăнăçу сунатпăр!

Е.КУДРЯШОВА.