13 января 2016 г.
Кăçалхи ăмăрту вара район шайĕнче иртрĕ темелле, мĕншĕн тесен ку хутĕнче Васан, Шăмăршă, Карапай-Шăмăршă тăрăхĕнчи спортсменсем хастар хутшăнчĕç. Елчĕк тата Сĕнтĕрвăрри тăрăхĕнчен раштаври канмалли кунсене яла хăнана килнĕ çемьесем хутшăнни те ăмăртăвăн пĕлтерĕшне самай çĕклерĕ. Ялти Тукас урамĕн вĕçĕнче йышлăн пухăннă халăха Васан ял тăрăхĕн пуçлăхĕ Ю.Ильин Христос Çуралнă кунĕ ячĕпе ăшшăн саламларĕ, ял халăхне çĕнĕ çулта çĕнĕ çитĕнỹсем тата çирĕп сывлăх сунчĕç, ялта тĕрлĕ енлĕ спорт ăмăртăвĕсем йĕркелесе ирттернине, сывă пурнăç йĕркине çирĕп пăхăнса пурăнма тăрăшнине ырларĕ. Ăмăртăва чи малтан шкул ачисем тухрĕç. 1-4 класра вĕренекенсенчен финиша Кирилл Марков çитсе 1-мĕш вырăн çĕнсе илчĕ, ун хыççăнах Владислав Ларионовпа Вячеслав Кудряшов вĕçлесе 2-3 вырăнсене йышăнчĕç. 18 çул тултарман хĕрсен хушшинче те ăмăрту хĕрỹ пулчĕ. Кунта вара финиша чи малтан Ирина Александрова (Сĕнтĕрвăрри) чупса çитрĕ, 2-мĕш вырăнта Камила Егорова (Васан) тухма пултарчĕ. 18 çул тултарман каччăсен хушшинче те Сĕнтĕрвăрринчен килнĕ хăна Денис Александров çĕнтерỹçĕ пулса тăчĕ. 2-мĕш вырăнта – Артем Денисов, 3-мĕш – Денис Ермолаев (иккĕшĕ те Карапай-Шăмăршăран). 50 çула çитичченхи хĕрарăмсен хушшинче вара уйрăмах хĕрỹ ăмăрту пулни куракансене татах та хавхалантарчĕ. Кивĕ Шăмăршă хĕрĕ пулнă Оксана Александрова (Ястребова) пурне те хыçала хăварса пĕрремĕш чупса тухрĕ. Ун хыçĕнченех Анджела Егорова (Васан) финиша çитрĕ. 3-мĕш вырăна вара Надежда Исаева (Кивĕ Шăмăршă) тивĕçрĕ. Арçынсен хушшинче чи вăйлисем ял пуçлăхĕ Юрий Ильин тата Владимир Урмаев (Васан) пулчĕç. Çемьесем хушшинчи ăмăртура Александровсен çемйине хăваласа çитекенни пулмарĕ, Васанти Егоровсен çемйи вара иккĕмĕш пулчĕ. Çĕнтерỹçĕсене пурне те хаклă парнесем, кубоксем тата Грамотасем парса чысларĕç. Ялти спорт уявĕ ăнăçлă иртрĕ, хутшăнакансем те, курма пухăннисем те тулли кăмăлпа килĕсене саланчĕç, уява йĕркелесе ирттернĕ Станислав Ястребовпа Вячеслав Антонова тата Алексей Антонова спонсор пулса пулăшнăшăн чун-чĕререн тав турĕç.
А.ЛАРШНИКОВА.