13 февраля 2016 г.
Пирĕн районти Шамккай ялĕнче çуралнă, 1996 çулта Чечняра бандитсемпе паттăррăн çапăçса çап-çамрăклах вилнĕ Олег Долгов ятне Шăмăршăсем ĕмĕр-ĕмĕр асра тытĕç. Раççей Геройне асăнса районта кашни çулах февраль уйăхĕнче патриотла юрăсен фестивалĕ иртет. Зонăри фестиваль Палтиелĕнчи Культура çуртĕнче иртрĕ, ăна кĕске сăмах каласа районти централизациленĕ клуб тытăмĕн ертỹçи В.Львова уçрĕ. Паттăра асăнса пĕр самант шăп тăнă хыççăн концерт пуçланчĕ. Унта Тăван çĕршыва, Раççей Çарне, паянхи пурнăçра паттăрлăх кăтартакан çамрăксене халалланă юрă-сăвă янăрарĕ. Палтиелĕнчи Татьянăпа Николай Долговсен, çак ялти Динара Емдиханован, Васанти Вика Исметован, Пуянкассинчи Ангелина Ишмуллинан, Палтиелĕнчи Ангелина Балакировапа Софья Зайцеван, Анат Чаткасри Анастасия Хрисанован тата ыттисен пултарулăхне залра ларакансем пысăк хак пачĕç. Вениамин Долгов гитарăпа салтак юррине шăрантарни те пурне те хумхантарчĕ. Ф е с т и в а л ь çĕнтерỹçисен йышĕнче - Анат Чаткасри Анастасия Хрисановапа Палтиелĕнчи Культура çурчĕ çумĕнчи илемлĕ пултарулăх коллективĕ. Вĕсене Грамотăсемпе тата Дипломсемпе чыс- ларĕç. Фестивале вĕçленĕ май, концерта ертсе пынă Т.Долгова Олег Долгова халалланă сăвва чун-чĕрене хумхантармалла вуларĕ: «Я вам из смерти гордо говорю, Я жизнь отдал, Отчизну защищая, Я завещаю вам Отечество беречь. Вернуть ему былую мощь и славу»
М.ГАЙНУЛЛОВА.