10 февраля 2016 г.
ФЕВРАЛĔН 5-мĕшĕнче Шупашкарта, филармони залĕнче Раççейре - Кино, Чăваш Енре - Ĕç çыннин çулталăкĕ уçăлнине халалласа савăнăçлă уяв иртнĕ. Çак чаплă мероприятие Чăваш Респуб-ликин Пуçлăхĕ Михаил Игнатьев хутшăннă. Михаил Васильевич малтанах ĕç çыннисене сума суса хатĕрленĕ куравпа паллашнă. Савăнăçлă мероприятире сăмах илсе, Михаил Игнатьев Кино тата Ĕç çыннин çулталăкĕсен пĕлтерĕшĕ çав тери пысăк пулнине палăртнă. «Пирĕн ĕç çыннин ырă та мухтавлă ятне малалла çĕклемелле», - тенĕ Чăваш Ен Пуçлăхĕ. Раççей халăх артисчĕ Николай Бурляев кинорежиссер килни те уява пысăк сум кĕртнĕ. Николай Петрович, кино пĕлтерĕшĕ пысăк тата ăна пирĕн халăх юратни çинчен каланă май, киноматографсен паянхи йывăр лару-тăрăвĕ çинче те чарăнса тăнă. «Вĕсене пулăшмаллах. Владимир Путин Президент 2016 çула кинона халалласа питĕ тĕрĕс йышăну турĕ», - тенĕ халăх артисчĕ. Республикăри Нягинсен тата Миллинсен ĕç династиллĕ çемйисем уявра хисеплĕ хăнасен шутĕнче пулнă. Раççейре - Кино, Чăваш Енре - Ĕç çыннин çулталăкĕ уçăлнине халалланă савăнăçлă уявра ЧНК Президенчĕ Николай Угаслов тата ытти яваплă çынсем пулнă. Конгресс кăçалхи ĕç планне кино тата ĕç çыннине халалланă ĕç-пуç чылай палăртнине каласа хăвармалла. «Çĕпĕр характерлĕ чăвашсем» документлă фильма НТРК тата ЮТВ каналсенче кăтартнă та ĕнтĕ. Кăçал тата та документла фильм ỹкересшĕн. Ăна пурнăçлама май уйăхĕнче Беларуç çĕршывне кайма палăртнă. Уявра ĕçре палăрнисене Чăваш Республикин Патшалăх наградисене тата ытти сумлă наградăсем парса чысланă. Çак чаплă уява пирĕн районтан та делегаци хутшăннă. Ăна район администрацийĕн пуçлăхĕн çумĕ В.Петьков ертсе пынă.
А.ПЕТРОВА, район администрацийĕн специалисчĕ.