18 февраля 2016 г.
КАРАПАЙ ШĂМĂРШĂРИ вăтам шкул çак кунсенче уяв ирттерчĕ - 5,10, 15, 20, 40 çул каялла шкул пĕтернĕ выпускниксене тĕлпулăва пуçтарчĕ.Калас пулать, самаях йышлăн пухăнчĕç тăван шкултан тĕрлĕ çулсенче вĕренсе тухнă çамрăксем - халĕ ĕнтĕ çĕршывăн тĕрлĕ кĕтесĕнче вырнаçнă специалистсем. Ăçта пурăнсан та, ырăпа кăна аса илеççĕ вĕсем вĕренỹ çулĕсене, шкулти учительсене. Пĕр-пĕринпе курса калаçмалли сахал-и тата? Тунсăхлаççĕ вĕсем тăван шкулшăн та, ачалăхри тус-юлташшăн та. Çавăнпа та чылайăшĕ палăртнă вăхăтран та чылай маларах çитрĕ шкула - юратнă вĕрентекенĕсене курма васкарĕ. Тĕлпулу, йăлана кĕнĕ тăрăх, выпускниксем шкул ачисен командипе волейболла вылянинчен пуçланчĕ. Кун хыççăн хăнасем шкулти музейре тата вĕренỹ кабинечĕсенче пулса курчĕç, унти çĕнĕлĕхсемпе паллашрĕç. Чаплă мероприятие вăтам шкул директорĕ Ю.Ермолаев уçрĕ, тĕлпулу ячĕпе пурне те ăшшăн саламларĕ. Малалла район администрацийĕн пуçлăхĕ В.Денисов сăмах илчĕ, шкула асра тытса тăракансен лайăх йăлине ырласа калаçрĕ. Владимир Васильевич хăй те çак шкулта пĕлỹ илсе çунат сарнă. Çавăн пекех ачалăх çулĕсене ырă сăмахсемпе кăна аса илсе çак шкултан вĕренсе тухнă «Химпром» ОАО пĕрлешĕвĕн пай пуçлăхĕ А.Чернов, «Нектар» фирма директорĕ В.Столяров, Карапай Шăмăршăри психоневрологи интерначĕн тĕп врачĕ Н.Поликарпов, районсем хушшинчи «Батыревский» полици уйрăмĕн начальникĕ А.Фомин, «МРСК Волга Чувашэнерго» филиалĕн Шăмăршă районĕнчи электросеть уйрăмĕн пуçлăхĕ А.Денисов тата ыттисем те тухса калаçрĕç. Уяв каçне тĕплĕн хатĕрленнĕ шкул коллективĕ. Педагогсем те, вĕренекенсем те илемлĕ юрăсем шăрантарчĕç, хăйсен пултарулăхĕпе савăнтарчĕç. Выпускниксем те хăйсен тавçăрулăхне тата актер ăсталăхне кăтартса хаваслăх кỹчĕç, шкула асăнмалăх парнесем пачĕç. 1994 çулта шкул пĕтернĕ вĕренекенсем, сăмахран, çĕнĕ йышши телевизор, 1985 çулта шкулпа сывпуллашнă А.Столяров вара шкул ачисен волейбол, баскетбол, футбол командисем валли 7 комплектран тăракан спорт формисем парнелерĕç. Уявăн иккĕмĕш пайĕнче шкулăн 125 çулхи юбилейне ирттересси пирки калаçу пычĕ. Кăçалхи майăн 21-мĕшĕнче пирĕн шкулта пĕлỹ пухнă кашни выпускника шкула йыхравлатпăр. Ачалăхăн телейлĕ утравне çитме вăхăт тупасса шансах тăратпăр!
Т.СТЕПАНОВА, шкул директорĕн çумĕ.