10 марта 2016 г.
«Сире мĕн пăшăрхантарать, хальлĕхе хăш ыйтăва татса паман? Сирĕн сĕнĕвĕрсем ĕçе лайăхлатма пулăшĕç», _ терĕ Вячеслав Александрович. Докладра ял тăрăхĕн пурнăçне анлăн çутатни, пуçланă ĕçсене малалла тăсасси пирки калани, çитменлĕхсене те пытарса хăварманни çамрăк руководителе чыс кỹрет. Карапай Шăмăршăпа Çĕнĕ Тăрăн ялĕсенче пурăнакансем тирпей-илемшĕн тăрăшассипе те, культурăпа спорт ĕçĕсемпе те районта ыттисене ырă тĕслĕх кăтартаççĕ. Выльăх-чĕрлĕх усраса, çĕр çинче ĕçлесе, вăрман çимĕçне пуçтарса укçа-тенкĕ ĕçлесе тăваççĕ. Пуху ĕçне Чăваш Республикин транспорт тата çул-йĕр хуçалăхĕн министрĕ Владимир Доброхотов хутшăннипе усă курса, Карапай Шăмăршăри вăтам шкул директорĕ Юрий Ермолаев шкул валли çĕнĕ автобус уйăрса пама ыйтрĕ. Халĕ усă кураканнине 2013 çултах туяннă, унпа инçе çула тухма та хăрушă. Кăçал 125 çул тултаракан пĕлỹ çурчĕшĕн автобус пысăк парне пулĕччĕ. Тепĕр ыйту та _ ял халăхне хумхантараканни. Шупашкар автовокзалĕнчен Карапай Шăмăршăна билет сутмаççĕ иккен. Ял çыннисен ирĕксĕрех Шăмăрша çити билет туянса тăкакланма тивет. Министр икĕ ыйтăва та ĕçлĕ лару-тăрура пăхса тухма шантарчĕ. Çавăн пекех вăл Шăмăршă районĕнче кăçал çул тăвас тĕлĕшпе пурнăçламалли ĕçсемпе те паллаштарчĕ. Ял çыннисен ыйтăвĕсем çине район администрацийĕн пуçлăхĕн çумĕ Владимир Никифоров та, районти яваплă вырăнсенче ĕçлекен ытти çынсем те хуравларĕç. Ял пурнăçĕнче ырă тĕслĕх кăтартакан маттур çынсене халăх умĕнче чыслани те кăмăла çĕклерĕ.
А.ШОМПОЛОВА.