15 марта 2016 г.
ÇАК кунсенче Шăмăршăри «Аленушка» ача садĕнче шкул çулне çитмен ачасем «Эпĕ – тĕпчевçĕ» ятпа район шайĕнче йĕркеленĕ мероприятире хăйсен пултарулăх ĕçĕсене хỹтĕлерĕç. Çапла, халĕ ачасем садикренех хăйсене интереслентерекен пĕр-пĕр ыйтăва тĕпчесе пĕлме тата ăна хỹтĕлеме хăнăхаççĕ. Малтанах ачасен ĕçĕсене ятарлă комисси пăхса тухнă, 11-ĕшне иккĕмĕш тапхăра тухма суйласа илнĕ. Садике çỹрекен тĕпчевçĕсем финала питĕ тăрăшса хатĕрленнĕ, вĕсем хăйсен ыйтăвĕсене тарăннăн уçса пама пултарчĕç, пĕрлех мультимедиа меслечĕпе те усă курчĕç. Хăшĕсем тата опыт урлă та курăмлă, ĕнентерỹллĕ каласа кăтартрĕç (сăмахран, «Сказка» ача садне çỹрекен А.Азизов). А.Ларшникова хăйĕн йăх историйĕ çинчен интереслĕ каласа панипе кăна çырлахмарĕ, темăпа çыхăннă аслашшĕ хайланă сăвва та илемлĕ вуласа пачĕ. Виçĕ номинаципе иртрĕ проект ĕçĕсене хỹтĕлесси. Район администрацийĕн вĕрентỹпе çамрăксен политики пайĕ йĕркеленĕ комисси кашни номинацирех çĕнтерỹçĕсемпе призерсене палăртрĕ, Дипломсемпе наградăларĕ. Акă вĕсем, чи пĕчĕк маттур тĕпчевçĕсем: - «Гуманитари» номинацире В. Краснова («Ромашка» ача сачĕ) тата А.Ларшникова («Сказка») -1-мĕш, А.Шерникова («Ромашка») – 2-мĕш вырăн йышăнчĕç; - «Çутçанталăк» номинацире С.Полковникова («Ромашка») – çĕнтерỹçĕ, К.Концова («Аленушка») – призер пулса тăчĕç; - «Çутçанталăк тата чĕрчунсем» номинацире: А.Вазанов 1-мĕш степень , А.Гордеева – 2-мĕш степень Дипломĕсене тивĕçрĕç. Арсенийпе Александра иккĕшĕ те «Ромашка» ача садĕнчен. Ю.Исаевапа (Асанкассинчи «Ласточка» ача сачĕ) Е.Рубцована («Сказка») активлăхпа тăрăшулăхшăн Тав хучĕсемпе хавхалантарчĕç. Пĕчĕк тĕпчевçĕсене тата вĕсене пулăшнă воспитательсене çитĕнỹпе саламлатпăр, малашне те ăнăçу кăна сунатпăр.
Л.ГОРДЕЕВА, методист.