15 марта 2016 г.
ВЛАДИМИР МАЯКОВСКИЙ поэт хăй вăхăтĕнче çапла каланă: «Все работы хороши, выбирай на вкус!» Çак чăнлăха паян аса илни те пăсмасть. Ним пытармалли те çук, юлашки çулсенче çамрăк ăрăва професси суйласа илме пулăшас тĕлĕшпе çителĕксĕр ĕçлетпĕр. Ялта механизаторсемпе выльăх-чĕрлĕх пăхакансем, тĕрлĕ специалистсем çитмеççĕ. Ватăраххисем тивĕçлĕ канăва кайсан, кам ĕçлĕ-ха уй-хирте е фермăра? Васанти пĕтĕмĕшле пĕлỹ паракан тĕп шкул дирекцийĕ, ялхуçалăхĕнчи лару-тăрăва тĕрĕс ăнланса, вĕренекенсем ĕç профессийĕ суйласа илччĕр тесе тăрăшать. Акă, çак кунсенче кăна-ха 8-9 классенче вĕренекенсем Патăрьелĕнчи агропромышленноç техникумĕнче хăнара пулчĕç. Ачасем кунта хатĕрлекен специальноçсемпе паллашрĕç, преподавательсемпе тата студентсемпе чуна уçса калаçрĕç. Кулинарипе кондитер çимĕçĕсен выставкипе паллашни те кăмăла çĕклерĕ. Патăрьелĕнчи агропромышленноç техникумĕнче автомеханик, повар, кондитер, тракторист-машинист, çĕвĕç специальноçĕсене вĕрентеççĕ. Каччăсем те, хĕрсем те хăйсем юратакан профессие суйласа илме пултараççĕ. Вĕсене пысăк квалификациллĕ преподавательсем пĕлỹ параççĕ, пурлăх никĕсĕ те пуян. Вĕрентỹ мастерскойĕсенче кирлĕ обору- довани çителĕклĕ. Шансах тăратпăр: техникумра пулни ачасен шухăш-туйăмне чылай улăштарĕ, шкул хыççăн яла кирлĕ профессисене суйласа илме хистĕ.
И.ЕНДИЕРОВА, Васанти пĕтĕмĕшле пĕлỹ паракан тĕп шкул директорĕн çумĕ.