29 марта 2016 г.
ХĔЛЕ виçĕ эрне каяллах ăсатрăмăр пулин те, кăçал март уйăхĕ сивĕ килни тата юрĕ те çукаласах тăни йĕлтĕрçĕсене киленичченех ярăнма май пачĕ. Иртнĕ эрнере юр ирĕлме пуçлани йĕлтĕр сезонне хупма вăхăт çитнине систерчĕ. Çак ятпа шăматкун хыр вăрманĕнче йĕлтĕрçĕсен ăмăртăвĕ пулса иртрĕ. Мероприятие йĕлтĕрçĕсене саламласа район администрацийĕн пуçлăхĕн çумĕ В.Петьков уçрĕ, пурне те хавас кăмăл, ăнăçу сунчĕ. Тĕп судья В.Антонов ăмăрту программипе паллаштарнă хыççăнах старта ертỹçĕсем тухрĕç. Хальхинче арçынсем хушшинче Ю.Ермолаев (Карапай Шăмăршăри вăтам шкул), Н.Тепитов (полици уйрăмĕ), В.Яковлев (Карапай Шăмăршă ял тăрăхĕ) палăрчĕç. Хĕрарăм-ертỹçĕсенчен пуринчен те хăвăртрах Н.Петрова (Карапай Шăмăршăри «Василек» ача сачĕ) чупса тухрĕ, ун хыççăн финиша Л.Угаринапа (администрацин МФЦ центрĕ) Н.Федорова (администрацин собес пайĕ) çитрĕç. Çумăр пĕрĕхкелесе тăнине пăхмасăр, шкул ачисем хушшинчи эстафета ăмăртăвĕ питĕ хĕрỹ иртрĕ. Вăтам шкулсем хушшинче Карапай Шăмăршă яшĕсем çивĕчрех пулчĕç. Шăмăршăсемпе пăчăрлăпашьелсем иккĕмĕшпе виççĕмĕш вырăнсене йышăнчĕç. Хĕрсенчен Шăмăршăри вăтам шкул команди вăйлăраххи курăнчĕ, иккĕмĕш вырăнта _ Карапай Шăмăршă шкулĕн команди. Пĕтĕмĕшле пĕлỹ паракан шкулсем çапла чупса тухрĕç: арçын ачасем хушшинче малти икĕ вырăна анатчаткассем йышăнчĕç, патирексем 3-мĕш вырăнпа çырлахрĕç. Хĕрачасем хушшинчи эстафетăра та пьедесталăн малти икĕ картлашки çине Анат Чаткас шкулĕ çĕкленчĕ. Виççĕмĕш вырăнта _ пуянкассисем. Ял тăрăхĕсем те командăсем тăратнă. Финиша чи малтан Карапай Шăмăршăран килнĕ йĕлтĕрçĕсем çил пек вĕçтерсе çитрĕç. Иккĕмĕшсем _ анатчаткассем, виççĕмĕшсем Васан ял тăрăхĕн спортсменĕсем. Районти учрежденисемпе организацисем те эстафетăра тупăшрĕç. Кунта вара райадминистрацин командине çитекенни пулмарĕ. Иккĕмĕш вырăна «Ромашка» ача сачĕпе подстанцин пĕрлештернĕ команди тухрĕ, виççĕмĕшсем _ психоневрологи интерначĕн ĕçченĕсем. Спорт мероприятийĕ вĕçленсен, яланхи пекех, çĕнтерỹçĕсемпе призерсене Хисеп грамотисемпе тата медальсемпе чысларĕç. Район администрацийĕн пуçлăхĕ В.Денисов çитĕнỹсемшĕн пурне те ăшшăн саламларĕ, хăйсен ял тăрăхĕсенче тăтăш хĕллехи ăмăртусем йĕркелесе тăнă руководительсене тав сăмахĕ каларĕ. Кăçал çак чыса Ю.Ильин (Васан ял тăрăхĕ), В.Яковлев (Карапай Шăмăршă), А.Чамеев (Кивĕ Чукал) тивĕçрĕç. Çавăн пекех Владимир Васильевич уйрăммăн Анат Чаткас шкулĕн командине çитĕнỹсемшĕн мухтарĕ (учителĕ Н.Зыков). Карапай Шăмăршăри вăтам шкулта 36 çул физкультура учителĕнче тăрăшакан И.Сабаева «Чăваш Республикин тава тивĕçлĕ учителĕ» хисеплĕ ят пани çинчен те пĕлтерчĕ, тăрăшуллă вĕрентекене малашне те ăнăçу туса пыма ырлăх-сывлăх сунчĕ. Çак кун йĕлтĕрçĕсем те, вĕсене хав- халантарма пынисем те техĕмлĕ вăрман сывлăшĕпе сывласа киленчĕç, тулли кăмăлпа килĕсене саланчĕç.
Г.ИВАНОВА.