08 апреля 2016 г.
ЧĂВАШ Республикин Пуçлăхĕ Михаил Игнатьев апрелĕн 6-мĕшĕнче Италирен килсе çитнĕ «Бандекки» ТМЯО ертỹçи Стефано Бандекки ертсе пыракан сумлă делегаципе ĕçлĕ тĕлпулу ирттернĕ.
Тĕплĕ калаçăва Чăваш Республикин экономика министрĕ Владимир Аврелькин, Чăваш Республикин ял хуçалăх министрĕ Сергей Артамонов, «ТУС» АХО генеральнăй директорĕ Николай Угаслов, Шупашкарти арматура завочĕн ертỹçисем Иван Павловпа Денис Володось хутшăннă.
Михаил Игнатьев хăнасене Чăваш Ен çине тимлĕх уйăрнăшăн тав тунă, инвесторсене республикăра аталантарса пыма яланах хатĕр пулнине, условисем çителĕклĕ таран йĕркеленине каланă. Правительство та, бизнес-пĕрлешỹ те регионта ял хуçалăх, вĕренỹ, промышленноç пайне аталантарса пырассипе йышăннă килĕшỹсене ырланине пĕлтернĕ. Италирен килнĕ паллă компанийĕн ертỹçи Стефано Бандекки хăйĕн сăмахĕнче Чăваш Ене килме ăна питĕ кăмăллă пулнине палăртнă.
Аса илтеретпĕр, çак ĕçлĕ ушкăн пирĕн регионта 2016 çулхи февраль уйăхĕнче пулнăччĕ. Стефано Бандекки Чăваш Ен Пуçлăхне Михаил Игнатьева ырă кăмăлпа сума суса кĕтсе илнĕшĕн, республикăра бизнеса йĕркелесе яма витĕм кỹнĕшĕн тав сăмахĕсем каланă. «Чăваш Енре инвесторсене аталанса пыма паха майсем пур. Çĕнĕ проектсене пурнăçа кĕртме лайăх условисем пуррине курса ĕнентĕмĕр», _ тенĕ сумлă хăна Стефано Бандекки. Михаил Игнатьев хăйĕн сăмахĕнче Правительствăн приоритетлă ыйтăвĕсенчен пĕри çыншăн инвестици хывасси пулнине палăртнă, квалификациллĕ кадрсем хатĕрлесси çине те пысăк тимлĕх уйăрни çинчен каланă. 2015 çулта республика конкурса хутшăнса, çĕнтерỹçĕ ята тивĕçнине, промышленноç тата инженер технологийĕ енĕпе специалистсене хатĕрлеме регионсем хушшинчи Центр хута янине пĕлтернĕ. Ку енĕпе ĕçе Раççей Федерацийĕн Правительствин Председателĕ Дмитрий Медведев март уйăхĕн 1-мĕшĕнче Чăваш Ене ĕçлĕ визитпа килнĕ чух та пысăка хурса хакланине асăннă Михаил Игнатьев. Республикăра вĕренỹ учрежденийĕсемпе тачă çыхăнса ĕçлеме кирлĕ пур условисем те çителĕклĕ.
Апрелĕн 6-мĕшĕнче Италин паллă «Бандекки» ТМЯО тата Шупашкарти арматура завочĕ пĕр-пĕринпе тачă килĕшсе ĕçлемелли ĕç хутне алă пусса çирĕплетнĕ. Ертỹçĕсем производство калăпăшне ỹстерме, тĕрлĕ хатĕрсене модернизацилеме палăртнă.