20 мая 2016 г.
ЮНКУН районта Пĕрлĕхлĕ информаци кунĕ иртрĕ, Шупашкартан килнĕ тата хамăр районта йĕркеленĕ информаци ушкăнĕсем ĕç коллективĕсемпе тата ял халăхĕпе тĕл пулса калаçрĕç. Информаци кунĕн теми: «Чăваш Республикин 2016 çулхи бюджет политики тата экономикăна аталантарас, халăх пурнăçне лайăхлатас тĕлĕшпе йышăнакан мерăсем çинчен». Çавăн пекех халăхпа тĕл пулнă чух ачасен çуллахи канăвне йĕркелесси, вут-кăварпа асăрхануллă пуласси пирки те калаçу пынă.
Чăваш Республикин транспорт тата çул-йĕр хуçалăхĕн министрĕ Владимир Доброхотовпа район администрацийĕн пуçлăхĕ Владимир Денисов «Шăмăршă лесничестви» хысна учрежденийĕн, 42-мĕш пушар чаçĕн, «Чăваш вăрманĕ» наци паркĕн коллективĕсемпе тĕл пулнă, информаци кунĕн темипе калаçу ирттернĕ.
Информаци ушкăнĕсем çак кун район çыннисене харпăр-хăй ыйтăвĕпе йышăнассине те йĕркеленĕ.
Ешерет калча, савăнать хресчен ...
Маларах акнă хирсенче чуна савăнтарса калча ешерет. Çураки вĕçленмен-ха, унччен йĕперех пулнипе техника кĕреймен лаптăксенче халĕ хĕрỹ ĕç шавĕ тăрать. _ Пурнăçăмри пĕрремĕш çуракине ирттеретĕп, _ терĕ «Восход» СХПК председателĕ Олег Алексеев. _ Паллах, хумханатăп. Çурхи тĕштырă культурисене 700 гектартан кая мар акасшăн эпир. Шел, минерал удобренийĕсем туянма вăй çитеймерĕ. Ал-ура çавăрма укçа тăвас тесех 60 гектар хуратул акатпăр. Вăрлăх çителĕклĕ, сутмалăх та пур. ... Кăнтăрлахи апат вăхăчĕ. Хирте ĕçлекенсем патне Светлана Ильинапа Ольга Степанова поварсем вĕри апат илсе килнĕ. Сăмах май, хуçалăх механизаторсене кунне икĕ хутчен тỹлевсĕрех апатлантарать. Çĕр ĕçченĕсемпе Пĕрлĕхлĕ информаци кунĕнчи темăсемпе калаçнă май, Чăваш Республикин ялхуçалăх министрĕн çумĕ Константин Никитин çакнапалăртрĕ: Чăваш Республикин 2016 çулхи бюджет политики йăлтах халăх пурнăçне лайăхлатассипе çыхăннă. Ялхуçалăхне аталантарасси _ пирĕн правительствăн тĕп тĕллевĕ. Акăнмасăр пĕр гектар çĕр те юлмалла мар, выльăх-чĕрлĕх отраслĕнче те татăклă улшăну тумалла. Механизаторсем пурте _ манăн лайăх паллакан юлташсем. Акă, Петр Воробьев 1978 çултанпах трактор рулĕ умĕнче. Хирте вăл туман ĕç те çук. Хастар ĕçшĕн ăна Чăваш Республикин Ялхуçалăх министерствин тата район администрацийĕн Хисеп грамотисемпе чысланă. Николай Степанов, Валерий Псаров тата Валерий Васильев трактористсем те _ ылтăн алăллă çынсем. Шăпах вĕсем пек ĕçченсем çинче тытăнса тăрать те ĕнтĕ паянхи ялхуçалăхĕ. Константин Никитин çĕр çыннисемпе чунтан калаçрĕ, вĕсен ыйтăвĕсем çине тулли хурав пачĕ. Информаци ушкăнĕ Анат Чаткас ял администрацийĕнче тата пĕтĕмĕшле пĕлỹ паракан тĕп шкулта ĕçлекенсемпе те тĕл пулчĕ. Ялхуçалăх министрĕн çумĕ ачасен çуллахи каникулне мĕнлерех йĕркелеме шутлани пирки интересленчĕ. Вĕренекенсем валли шкулта ĕçпе кану лагерĕ уçăлать иккен. Çу кунĕсенче ашшĕ-амăшне пулăшас кăмăл- лисем те йышлă. Хулана экскурсие кайса курма та шутлаççĕ. 465 вĕренекен валли туса лартнă шкулта кăçал 82 ача пĕлỹ илет. Ял тăрăхĕнче демографи ыйтăвĕ çивĕч тăрать. Кăçалхи тăватă уйăхра пурĕте икĕ ача çеç çуралнă, пĕр туй та кĕрлемен. Ялхуçалăх министрĕн çумĕ çамрăксене харпăр-хăй ĕçне йĕркелес ĕçре пулăшма пулчĕ, Андрейпе Юрий Юнкеровсенчен _ çамрăк фермерсенчен _ тĕслĕх илме сĕнчĕ. Шкул çуртĕнче те, пахчара та тирпейлĕ. Учительсем, ачасене тарăн пĕлỹ панипе пĕрлех, ĕçе юратма вĕрентни те сисĕнет. Шкул пахчинче тĕрлĕ пахча-çимĕç çитĕнтереççĕ, чечексем ешереççĕ. Информаци ушкăнĕ Геннадий Макаров фермерăн хуçалăхĕнче те пулчĕ, тикĕс акнă хирсене курса савăнчĕ. Минерал удобренийĕн усси пысăк çав: калча çав тери хỹхĕм ỹсет, тухăç лайăх пуласса шантарать.Фермер 76 пуç сăвакан ĕне усрать. Выльăхсене Александр Тимошкинпа Виталий Богатов кĕтỹçĕсем ирпе ултă сехетрех чечеклĕ улăха илсе тухнă. Шыв та юнашарах. Каçхи сăвăм хыççăн та ĕнесене ешĕл курăк çинче çỹретеççĕ. Лайăх пăхнипех ĕнесем сĕтне те нумай антараççĕ. Ферма заведующийĕн Виталий Макаровăн сăнỹкерчĕкне районти Хисеп хăми çине вырнаçтарни пурин кăмăлне те çĕкленĕ. _ Чăннипех те тивĕçлĕ çын! _ çакăн пек хак пачĕç выльăх-чĕрлĕх пăхакансем хăйсен ертỹçине. Чăваш Республикин ялхуçалăх министрĕн çумĕ Константин Ники- тин та çаплах шутлать. Маттур ял ĕçченĕсене Ĕç çыннин çулталăкĕнче чыс-хисеп туни район администрацийĕн ырă ятне те çĕклет.
Ив.САЛАНДАЕВ. (Сăнỹкерчĕкĕсем авторăн).
ПУЯНКАССИ ял тăрăхĕнче те информаци кунне хутшăнма килнĕ хамăр ентеш, Чăваш Республикин Патшалăх Канашĕн Аппарачĕн ертỹçи А.Ухтияров патне те сахал мар ыйту пулчĕ. Анатолий Ильич, юрист пулнă май, кашни ыйтăва тĕплĕн ăнлантарса пама тăрăшрĕ, канашсем пачĕ. Çынсене политика ыйтăвĕсем кăна мар, районта çурхи ака-суха ĕçĕсем мĕнлерех пыни те кăсăклантарать. Ял тăрăхĕн администрацийĕн пуçлăхĕ А.Кузьмин каланă тăрăх, «Колос» ОООра, «Карлинская» ЗАО «Агрофирмăра», Г.Макаровăн хресчен (фермер) хуçалăхĕнче ĕçсем вĕçленнĕпе пĕрех _ акăнман пĕр лаптăк та юлмĕ. Информаци кунĕн тепĕр сăлтавĕ _ малтанхи суйлав ирттересси. Камсем депутатсем пулĕç _ çакă хамăртан килет.
В.МИХАЙЛОВ.