20 мая 2016 г.
КАРАПАЙ ШĂМĂРШĂРИ вăтам шкул районта лайăххисен шутĕнче. Çакна вĕренекенсем те, вĕрентекенсен коллективĕ те çулсерен çирĕплетсех тăрать. Кунта кăçал 145 ача пĕлỹ илет тата ултă çулхи 17 ача шкула кайма хатĕрлекен программăпа вĕренет. Педагогсем вунтăххăрăн. Чылайăшĕ ĕçре пуян опыт пухма ĕлкĕрнĕ: И.Сабаев _ Чăваш Республикин тава тивĕçлĕ учителĕ, икĕ вĕрентекен _ РФ вĕрентỹ ĕçĕн хисеплĕ ĕçченĕ. Халăха вĕрентес ĕç отличникĕ те иккĕн. Раççей Федерацийĕн, Чăваш Республикин Вĕренỹ тата çамрăксен политикин министерствисен Хисеп грамотисене кашни иккĕмĕш учитель тивĕçнĕ.
Икĕ хутлă кирпĕчрен тунă шкул çурчĕ 1984 çулта хута кайнă. Куллен шкул ачисене çĕнĕ оборудовани вырнаçтарнă 15 вĕренỹ кабинечĕ, столовăй, спорт залĕ, ĕç мастерскойĕ йышăнать. Шкулта вĕри шыв та, канализаци те пур. 2006 çултанпа Карапай Шăмăршăри вăтам шкул районти эксперимента хутшăнса профиллĕ вĕрентỹ йĕркипе ĕçлеме пуçланă, 2007 çултанпа _ кадет класĕсен республикăри эксперимент площадки. 2008 çулта шкул коллективĕ тепĕр çĕнĕлĕхе алла илме тытăннă _ ачасене пуçламăш класран акăлчан чĕлхине тарăннăн вĕрентес ĕçе пуçăннă. Калас пулать, пур эксперимент та ăнăçлă иртнĕ, хальхи вăхăтра штатри режима куçнă. Шкул _ «Пурте пĕрле _ çул-йĕр çинчи хăрушсăрлăхшăн» республика проекчĕн пилот площадки те. Çавна май шкул ачисем кашни çулах респу- бликăри çамрăк инспекторсен «Безопасное колесо» конкурсне хутшăнса призлă вырăнсем çĕнсе илеççĕ. Шкулта физкультурăна килĕштермен ача çук та пулĕ. Юлашки 26 çул хушшинче шкул команди районти Спартакиадăра 14 хутчен çĕнтерỹçĕ ята çĕнсе илнĕ. Уйрăмах çăмăл атлетикăпа, йĕлтĕрпе чупассипе, ишессипе тата алă вăйĕвиçессипе (армспорт) районта кăна мар, республикăри ăмăртусенче те палăраççĕ. Сăмахран, шкул ачисем 2014 çулта Чăваш Республикин Пуçлăхĕн Кубокне çĕнсе илессишĕн йĕркеленĕ армспорт тупăшăвĕнче иккĕмĕш, 2015 çулта республикăри йĕлтĕрçĕсен ăмăртăвĕнче 1-мĕш вырăн йышăнчĕ. «Ылтăн шайба» зонăри хоккей вăййине хутшăнма та пĕрре кăна мар тивĕçнĕ. Ишессипе те дипломсем пайтах. Д.Ермолаев, А.Денисов, К.Степанов, Е.Карпов, А.Лукьянов, Д.Макарова, Д.Ермолаева, С.Ларионова, Т.Карпова питĕ пултаруллă. Е.Михайлов вара дзюдо ăмăртăвĕнче тăтăшах çĕнтерет. «Орленокпа» «Зарница» çар вăййисем _ шкулта вĕренекенсен чи юратнă вăййисем. Районта миçе хут çĕнтернĕ-ши _ никам та тĕплĕн калаймасть. Кашни çулах теме пулать. Республикăра вара 2014 çулта «Орленок» команда 3-мĕш, 2015 çулта _ «Зарница» 2-мĕш вырăн йышăнчĕ, «Орленок» çĕнтерỹçĕ пулчĕ. Вĕрентекенсем пурнăç уттинчен юлас мар тесе тăрăшса ĕçлеççĕ. Пирĕн вăтам шкулта час-часах вĕрентỹри çĕнĕлĕхсене алла илме районти шкул ертỹçисем валли семинарсем йĕркелеççĕ, педагогсен паха ĕç опычĕпе паллашаççĕ. Вĕренекенсем районти тĕрлĕ предмет олимпиадисемпе наука конференцийĕсенче çитĕнỹ тăваççĕ. Уйрăмах ОБЖ предмечĕпе савăнтараççĕ. 2014 çултанпа шкул ачисем çак предметпа районта çĕнтерсе республикăра та хутшăнаççĕ. Хутшăнаççĕ кăна-и? Призлă вырăнсем çĕнсе илеççĕ. Акă, кăçалхи вĕренỹ çулĕнче те Д.Ермолаевпа А.Лукьянов регион олимпиадинче, Шупашкарта, ОБЖ предмечĕпе призерсем пулса тăчĕç. Юлашкинчен çакна калас килет: педагогсен йышĕ _ пултаруллă, çĕнĕлĕхе юратакан, иксĕлми вăй-халлă талантлă коллектив. Пирĕн шкул Санкт- Петербург хули ирттернĕ конкурса хутшăнса, 2015 çулта çĕршывăн чи лайăх 100 шкулĕ шутне кĕме тивĕçрĕ. Малашне татах та пысăк çитĕнỹсем пуласса шансах тăратăп.
Пирĕн ĕç-хĕлпе тĕплĕнрех паллашма, ачалăхри тус-юлташăрпа тĕл пулма çак шкулта вĕреннĕ е ĕçленĕ çынсене пурне те майăн 21-мĕшĕнче шкулăн 125 çулхи юбилейне уявлама чĕнетпĕр. Юбилей программи ирхине 9 сехетрен пуçласа мĕн каçчен тăсăлать. Пырса курăр тăван шкула уява!
Ю.ЕРМОЛАЕВ, Карапай Шăмăршă вăтам шкулĕн директорĕ.