24 мая 2016 г.
КАРАПАЙ ШĂМĂРШĂ ялĕнче иртнĕ шăматкун чăн-чăн уяв пулчĕ _ шкул хăйĕн 125 çулхи юбилейне паллă турĕ. Мĕн чухлĕ хăна ятарласа килсе çитнĕ çак праçнике _ шкула, вĕрентекенсене ырăпа асра тытнăран ĕнтĕ. Шкул çурчĕ те хăнасене тивĕçлĕ кĕтсе илме тăрăшсах хатĕрленнĕ. Урамранах _ тирпей-илем, шкула кĕрсен _ капăр стенасем, çĕнĕлле йĕркеленĕ стендсем куçа илĕртеççĕ. Вĕсем шкул пурнăçне сăнласа параççĕ. Классенче – хăтлăх, килĕшỹллĕ вырнаçтарнă çĕнĕ партăсемпе шкафсем.Чỹрече анисем çинче тĕрлĕ тĕслĕ чечек ỹсет. Икккĕмĕш хутри коридорта та питĕ нумай илем _ сĕтелсем çинче ачасем хăйсем аллипе ăсталанă чечексем – тĕрленĕ, çыхнă е хутран тунăскерсем – куçа илĕртсе тăраççĕ. Шкул – чечек ăшĕнче. Ачасем пурте хавас кăмăллă, тĕрлĕ çулсенче çак шкулта ĕçленĕ педагогсем пенси çулĕсене манса кайсах хăйсен кабинечĕсене яланхи пекех васкаççĕ _ 3-мĕш урока педагогика ветеранĕсен ирттермелле-çке! Тахçантанпах кĕтнĕ пуль çак савăнăçлă та хумхануллă саманта Л.Карпова, К.Елисеева, Л.Козлова, В.Степанова, Р.Кузьмина, А.Трофимова, В.Елисеева... Урокра çак кун шкул ачисем кăна мар, техникум, училище, институт-университет, академи пĕтерсе тĕрлĕ ĕç вырăнĕсене йышăнакансем те лараççĕ вĕт! Вĕсем хăйсене пурнăç çулĕ çине тухма пулăшаканĕсене тав сăмахĕ калама килнĕ. Юбилей уяв линейкинчен пуçланчĕ. Ăна шкул дирек- торĕ Ю.Ермолаев уçрĕ. Линейкăра _ шкул ачисем, вĕсен ашшĕ-амăшĕ, ял халăхĕ (пурте çак шкулта пĕлỹ илнĕ) педагогика ĕçĕн ветеранĕсем, хăнасем. Вĕренекенсемпе пĕрле шкула халалланă илемлĕ сăвăсем тĕрлĕ çулсенче вĕренсе тухнă выпускниксем те каларĕç. Юбилей шăнкăравне пама Карапай Шăмăршăри вăтам шкулта нумай çул директорта ĕçленĕ В.Кузьминпа Л.Козлова педагог-пенсионер тивĕçнĕ. Чаплă лару-тăру малалла стадионта тăсăлчĕ. Уяв концертне пĕтĕм район хутшăннă тесен те йăнăш пулмĕ. Районти искусство шкулĕн музыка уйрăмĕнче вĕренекенсемпе вĕсен преподавателĕсем, Культура Керменĕн артисчĕсем çепĕç юрă-кĕвĕ парнелерĕç. Сумлă хăнасем, вăл шутра çак шкулта çунатланнă райадминистраци пуçлăхĕ В.Денисов, республикăри Патшалăх Канашĕн депутачĕ О.Мешков, район администрацийĕн вĕрентỹ пайĕн пуçлăхĕ Н.Ендиеров, пухăннисене пурне те уяв ячĕпе ăшшăн саламларĕç, вĕрентỹпе воспитани ĕçĕнчи çитĕнỹсемшĕн уйрăм педагогсене Хисем хучĕпе тата Тав çырăвĕпе чыс турĕç, шкула асăнмалăх хаклă парнесем пачĕç. Çак шкулта 36 çул ырми-канми ĕçлекен физкультура учителĕ И.Сабаев «Чăваш Республикин тава тивĕçлĕ учителĕ» ятне илни çинчен пĕлтерекен документа уяв халăхĕ тăвăллăн алăçупса йышăнчĕ. Шкул юбилейне килнĕ çынсем тĕлпулупа питĕ кăмăллă пулчĕç. Шкулта пĕрле вĕреннĕ тус-юлташĕпе курнăçса калаçрĕç, ачалăхне аса илчĕç. Хăйсене вĕрентнĕ учительсемпе тĕл пулни тата мĕне тăрать _ яланхиллех ырă сунаççĕ вĕсем, вĕренекенĕсен çитĕнĕвĕсемшĕн ĕмĕрĕпех чун-чĕререн савăнаççĕ. Шкул çĕнелсе пыни пурне те тĕлĕнтерчĕ _ хулари шкулсенчен пĕрре те кая мар. Кунта выпускниксен тỹпи те пур _ юбилей майĕпе сахал мар пулăшнă. Хăшĕсем шкулта хăш-пĕр юсав ĕçĕсем ирттерме, стендсем тума, хăшĕсем шкул музейĕнчи экспонатсене вырнаçтармалли стеллажсемпе, хăшĕ – вĕренỹре усă курмалли хатĕрсемпе, спорт тумĕн комплекчĕсемпе пулăшу кỹнĕ. Юбилей садне хывмашкăн хунавсем туянма та вĕсемех укçа-тенкĕпе пулăшнă. «Здравствуй, Школа, мы твои ученики» кĕнеке те Ю.Тимофеев спонсор укçипе пичетленсе тухнă. Пĕр сăмахпа, карапайшăмăршăсем тăван шкулне юратаççĕ, унăн ĕçĕ-хĕлĕпе савăнаççĕ, пархатарлă вĕрентỹпе воспитани ĕçĕ малашне те хăйĕн çимĕçне тухăçлă парса тăтăр тесе пурте тăрăшаççĕ.
Г.ИВАНОВА.