24 мая 2016 г.
ВЫРСАРНИКУН, майăн 22-мĕшĕнче, Чăваш Енре «Единая Россия» партин малтанхи сасăлавĕ иртнĕ. Ку вăл Раççей Федерацийĕн Патшалăх Думине тата Чăваш Республикин Патшалăх Канашне кăçал сентябрь уйăхĕнче суйлава хутшăнакан кандидатсен списокне палăртма кирлĕ. Калас пулать, паянхи кун тĕлне «Единая Россия» парти çĕршывра демократиллĕ, уçă сасăлав ирттерекен пĕртен-пĕр парти.РФ Патшалăх Думин депутачĕ Алена Аршинова каланă тăрăх _ хăй вăл çак кун И.Н.Ульянов ячĕллĕ Чăваш патшалăх университетĕнчи участокра сасăланă _ ытти хăшпĕр политика партийĕсем хăйсен кандидачĕсен списокне епле палăртнине ăнланма май çук пулсан, «Единая Россия» партин кандидачĕсене халăх хăй суйлать. Малтанхи сасăлав депутат пулас текен кандидатсемшĕн те, суйлавçăсемшĕн те пĕлтерĕшлĕ пулнине палăртрĕ. Чăваш Ен Пуçлăхĕ Михаил Игнатьев та хăйĕн çемйипе Шупашкарти П.Хусанкай ячĕллĕ Культура Керменне савăнăçлă кăмăлпа килнĕ. Бюллетень илес текен нумай пулнăран республика Пуçлăхĕн те черетре тăма тивнĕ. Çав хушăра вăл çынсемпе калаçнă, вĕсен шухăш-кăмăлĕ пирки ыйтса пĕлнĕ. Ăна хула çыннисен хастарлăхĕ, вĕсем Раççей тата Чăваш Ен пуласлăхĕ пирки шухăшлани савăнтарнă. Шупашкар хулин пуçлăхĕ Леонид Черкесов сасăлав участокне мăшăрĕпе тата икĕ ачипе çитсе сасăланă. «Ку процедура çынсемшĕн те, кандидатсемшĕн те яваплă утăм», _ пĕтĕмлетнĕ хула пуçлăхĕ. Чăваш Республикин Патшалăх Канашĕн Председателĕн çумĕ, «Единая Россия» партин регион уйрăмĕн секретарĕ Николай Малов тăван Етĕрне хулинче сасăланă. Вăл та малтанхи сасăлав «Единая Россия» партире тăманнисемшĕн те çĕршыв пуласлăхĕшĕн пысăк пĕлтерĕшлĕ пулни çинчен каланă.