27 мая 2016 г.
МАЙĂН 25-мĕшĕнче районти шкулсенче юлашки шăнкăрав янăрарĕ. Шăмăршăри вăтам шкултан кăçал 32 ача вĕренсе тухать. Çак ятпа вĕсене шкул директорĕ В.Хорькова ăшшăн саламларĕ, экзаменсене ăнăçлă тытса хăйсен ĕмĕчĕсене пурнăçлама ырă сунчĕ. Вера Васильевна вĕренỹре, спортра тата обществăлла ĕçре çитĕнỹсем тунă выпускниксене Хисеп грамотипе, Тав çырăвĕпе чысларĕ. Çавăн пекех вăл актив- лăхпа палăрнă хăш-пĕр ашшĕ-амăшне, воспитани ĕçне пысăк яваплăхпа пурнăçласа пынă класс ертỹçисене те Тав хучĕпе хавхалантарчĕ.Шкул ачисем те, пĕрремĕш класс руководителĕсен ячĕпе Н.Мартынова учитель те выпускниксене чĕререн саламларĕç, пурнăçра çитĕнỹсем туса пыма сунчĕç. 11-мĕш класс ачисем те хăйсене вĕрентнĕ учительсене чун-чĕререн тав турĕç, юрă-ташă парнелерĕç. Юлашки шăнкăрав паракансем А. Хорьков выпускникпе 1-мĕш класра вĕренекен Л. Семенова пулчĕç. Йĕс шăнкăрав сасси шкулпа сывпуллашакан яшсемпе хĕрсене те, уява пухăннă ял çыннисене те хумхантарчĕ, шухăша ячĕ... Шкул ертỹçисем Юлашки шăнкăрав уявне питĕ интереслĕ йĕркеленĕ. Выпускниксене учительсем пурнăç картлашки тăрăх çỹлтен - çỹле хăпарса пыма «Ырă канашсем», «Ăнăçу», «Ашшĕ-амăшĕн юратăвĕ», «Ачалăхри ырă асаилỹ сем», «Пĕлỹшĕн çунни», «Çĕнĕ тĕпчевсем» тесе çырнă хутаçсем парса телейлĕ çула тухма ырă сунчĕç. Т.Анисимова, 11-б класс руководителĕ, шкул пĕтерекенсене ырăлăх патне тỹрĕ çулпа çитме сунчĕ. «Тăван çĕршывăн тивĕçлĕ гражданĕсем пулăр!» _ 11-а класс ертỹçи Н.Петрова каланă çак сăмахсем кашни выпускникăн асĕнче яланах пуласса шанас килет. Пăчăрлă Пашьел Ĕнче кăçал 14 ача вăтам шкул пĕтерет. Çак ятпа вĕсене линейкăра шкул директорĕ Н.Симурзина чĕререн саламларĕ, пултаруллă выпускниксене Хисеп грамотипе наградăларĕ. Çавăн пекех вĕренекенсене район а д м и н и с т р а ц и й ĕ н вĕрентỹ пайĕн методисчĕ Л.Гордеева, ял администрацийĕн специалисчĕ Т.Антонова та саламласа ырă çул сунчĕç. Пуçламăш классенче вĕрентнĕ А.Краснова, Т.Андреева учительсем, класс руководителĕ В.Савельева та 11-мĕш класран вĕренсе тухакансене ăшă сăмахсем каларĕç, экзаменсенче ăнăçу сунчĕç. Ачасен ашшĕ-амăшĕ вара педагогсене тарăн пĕлỹ, тивĕçлĕ воспитани панăшăн тав сăмахĕ каларĕ. Юлашки шăнкăрава С.Можаев выпускникпе пĕрремĕш класра вĕренекен Е.Корчакова янăратрĕç. Анат Чаткасри пĕтĕмĕшле пĕлỹ паракан тĕп шкулти 9-мĕш класран вĕренсе тухакан 15 ачашăн та çак кун юлашки шăнкăрав янăрарĕ. Уяв линейкине Т.Воробьева директор уçрĕ, пурне те ăшшăн саламларĕ. Выпускниксене, паллах, экзаменсене лайăх тытма, малашнехи пурнăçра тĕрĕс çул-йĕр суйласа илме ăнăçу сунчĕ. Хăнасем те _ район а д м и н и с т р а ц и й ĕ н вĕрентỹ пайĕн методисчĕ Э.Можаева, ял администрацийĕн специалисчĕ Н.Пименова, ялти хисеплĕ çын М.Ухваркин _ шкул пĕтерекенсене ырă çул сунчĕç. Выпускник амăшĕ С.Бахитова пурин ячĕпе те учительсене чĕререн тав турĕ.
Г.ИВАНОВА.
КĔСКЕ СПРАВКА Кăçал районта вăтам шкул пĕтерекен выпускниксем _ 65, пĕтĕмĕшле тĕп шкултан вĕренсе тухакансем _ 160. Выпускниксенчен çиччĕшĕ шкула медальпе пĕтерме ĕмĕтленет.