27 мая 2016 г.
МАЙĂН 27-мĕшĕнче Пĕтĕм Раççейри библиотекăсен кунне паллă тăваççĕ. Ăна РФ Президенчĕ Б.Ельцин Указĕпе килĕшỹллĕн 1995 çултанпа уявлаççĕ. Шăмăршă районĕнче пурĕ 13 библиотека ĕçлет _ 1 тĕп библиотека, 12 ялти библиотека. Вĕсенче 17 специалист вăй хурать. Библиотекарьсен коллективĕ туслă та пултаруллă. Библиотека ĕçченĕсен тĕп тĕллевĕ _ халăхăн информаци тата культура шайне çĕклесси, тавракурăмне аталантарасси. Вĕсем Тăван çĕршыва юратас, çутçанталăка упрас, сывă пурнăçа явăçтарас, мораль тата саккун йĕркисене пăхăнса пырас енĕпе тăрăшаççĕ. Вулакансен йышне ỹстерес тĕлĕшпе те сахал мар вăй хураççĕ библиотека ĕçченĕсем: литература каçĕсем, вулавсем, кĕнеке куравĕсем йĕркелеççĕ, вулакансен кăмăлне шута илсе тĕрлĕрен пĕрлешỹсем ертсе пыраççĕ. Календарь çинчи пĕр уяв та тимлĕхсĕр юлмасть _ интереслĕ мероприятисем ирттереççĕ. Тĕрлĕ çын çỹрет библиотекăна, кашнин валли ăшă сăмах тупса, ăнланса, чунтан калаçма тăрăшаççĕ библиотекарьсем. Çакна та палăртса хăварас килет: библиотекăра ыттисене курăнман ĕç те пайтах пурнăçланса пырать. Информаци базине те çĕнетсех тăратпăр, сăмахран, ял историйĕ, ялти тава тивĕçлĕ çынсем, Тăван çĕршывăн Аслă вăрçине хутшăннă ентешсем, ялхуçалăх ĕçченĕсем тата ытти те. Çывхарса килекен професси уявĕ ячĕпе халь ĕçлекен тата тивĕçлĕ канури библиотекарьсене _ пурне те ăшшăн саламлатпăр. Кун-çул сукмакĕпе пĕр такăнмасăр малалла утма çирĕп сывлăх, иксĕлми вăй- хал , ăнăçу сунатпăр.
И.ТИМОФЕЕВА, тĕп библиотекăсен тытăмĕн директорĕ.