04 июня 2016 г.
ИЮНĔН пĕрремĕш кунĕсенче районта шкул ачисен «Зарница» тата «Орленок» вăййисем иртрĕç. Тăхăр шкултан 105 ача хутшăннă кăçал çар вăййисене. Мероприяти хĕвеллĕ кун район администрацийĕ умĕнчи лапамра пуçланчĕ. Отделени командирĕсем республикăн Патăрьелпе Шăмăршă районĕсен çар комиссариачĕн пай уйрăмĕн пуçлăхĕ Е.Семенов подполковнике «Зарницăпа» «Орленок» вăййисене хутшăнма хатĕррине пĕлтереççĕ. Çĕршыв тата республика Гимнĕсем мăнаçлăн янăранă самантра пĕлтĕрхи çар вăййисен чи хастар командирĕсем _ С.Еремеевпа (Шăмăршă) А.Лукьянов (Карапай Шăмăршă) _ Раççей Федерацийĕн тата Чăваш Республикин ялавĕсене çĕклеççĕ. «Çар тумĕ» тăхăннă яшсемпе хĕрсем штандартпа чыслăн стройпа утса иртеççĕ. Ку вăл пĕрремĕш конкурс _ «Статен и строен _ уважения достоин». Малалла пĕрремĕш кун конкурсĕсем Шăмăршăри вăтам шкулта (вăй-хал гимнастики) тата «Туслăх» спорт комплексĕнче (теори ыйтăвĕсем çине хуравласси, эстафетăпа ишесси) пулса иртрĕç. Виçĕ кун хушшинче пулас çĕршыв хỹтĕлевçисем нумай тĕрĕслев витĕр тухрĕç, ăмăртрĕç, вăй виçрĕç. Çутçанталăк инкекĕсенчен те _ пушар, шыв илни, аçа-çиçĕм çапни тата ытти те _ «çăлăнчĕç», «радиаци» вăхăтĕнче те хăйсене пулăшма пултарчĕç, компоспа усă курса «снайпера» та шыраса тупрĕç, автомата вăхăтпа салатса пуçтарчĕç, винтовкăпа тĕл перессипе тупăшрĕç. Кунĕпе чупса-сиксе ĕшеннĕ хыççăн вара каçхине творчество конкурсĕнче пĕр-пĕрин пултарулăхне курса киленчĕç. Ачасем хушшинче гитарăпа калама пĕлекенсем те пур. Вальс ташлама кашниех килĕштерет пулмалла, уйрăмах кунта кадетсем палăрчĕç. Палаткисене çар вăййисене хутшăнакансем кăçал пуçласа ипподромра вырнаçтарчĕç. Вырăнĕ пурне те тивĕçтерет _ тирпей-илемĕпе те, конкурссем ирттерме кирлĕ условисемпе те. Ипподром йĕри-таврашĕнчи çамрăк хунавсем те ỹссе тĕрекленсе кайнă, вăрман пекех курăнаççĕ. Аякран пăхсан _ вăрман çумĕнчи палаткăллă хула. Çапла уçă сывлăшра, çар лагерĕнче, виçĕ кун пĕр сисĕнмесĕр иртсе кайрĕ. Çак хушăра тĕрлĕ ялтан пуçтарăннă ачасем пĕр-пĕринпе çывăхрах паллашрĕç, чылайăшĕ уйрăлми туссем пулса тăчĕç. Кунта тĕп девиз: пĕри _ пуриншĕн, пурте _ пĕриншĕн. Конкурс конкурсах, çĕнтерỹçĕсене палăртма тивет. «Зарницăра» та, «Орленокра» та _ Шăмăршăри вăтам шкул ачисем чи пултаруллисем пулчĕç. Çавăн пекех Карапай-Шăмăршăра вĕренекенсен икĕ отделенийĕ те 2-мĕш вырăнсене йышăннă. Виççĕмĕш призерсем _ пăчăрлăпашьелсемпе шăмăршăсем (2-мĕш команда). Чи лайăх командирсем вара Карапай Шăмăршăри вăтам шкултан _ А.Лукьянов («Орленок») тата К.Степанов («Зарница»). Çĕнтерỹçĕсемпе призерсем Дипломсене тивĕçрĕç. Маттур, çамрăк армеецсем! Республикăри вăйăра та ăнăçу пултăр сире!
Г.ИВАНОВА.