23 июня 2016 г.
ÇАК статьяра эпĕ районти налук службин ĕçĕ-хĕлĕпе паллаштарасшăн. Иртнĕ саманара Раççей çĕршывĕнче халăха бюджет тăкакĕсене саплаштарма тĕрлĕ налук тỹлеттерсе сахал мар тертлентернĕ. Унăн историйĕпе 2010 çулта Шупашкарта Чăваш кĕнеке издательствинче пичетленнĕ «Налоговая служба. Вчера – сегодня: 1990- 2010» кĕнекене алла тытса вуласан тĕплĕнрех пĕлме пултаратăр. Пурнăç, паллах, пĕр вырăнта тăмасть, çулсем хутшăннăçемĕн çĕршыв аталанăвĕнче улшăнусем, çĕнĕлĕхсем пулсах пыраççĕ. 1990 çулхи январĕн 24-мĕшĕнче СССР Министерствин Совечĕ хăйĕн постановленийĕпе Финанс министерстви тытăмĕнче патшалăх налук службине йĕркеленĕ. СССР Финанс министерстви çак çулхи февралĕн 21-мĕшĕнче хăйĕн 12-мĕш номерлĕ хушăвĕпе патшалăх налук инспекцийĕсене йĕркелесси çинчен хушу çитернĕ. Мартăн 5-мĕшĕнче РСФСР Финанс министерстви тытăмĕнче патшалăхăн налук инспекцийĕ йĕркеленнĕ. Мартăн 5-мĕшĕнче РСФСР Финанс министерстви хушăвĕпе Чăваш Республикинче те Финанс министерстви тытăмĕнче патшалăхăн налук инспекцийĕ йĕркеленнĕ. Март уйăхĕнчен пуçласа июль вĕçлениччен районсенче те ятарлă служба _ налук инспекцийĕсем _ ĕçлеме пуçланă. 1992 çулхи февралĕн 10-мĕшĕнче патшалăх налук инспекцине Чăваш Республикинчи Финанс министерствин тытăмĕнчен кăларнă. Вăл хăй тĕллĕн ĕçлекен учреждени пулса тăнă. РФ Саккунĕпе килĕшỹллĕн, вырăнта налук пухас йĕркене пăхăнса ĕçлеме тытăннă. Районти налук инспекцийĕн малтанхи ертỹçи _ Галина Кузьминична Алимова (апрель, 1990 _ декабрь, 1992). Шел, вăл çамрăклах пиртен уйрăлса çĕре кĕчĕ. Малалла çак тивĕçе Анатолий Михайлович Кузьмин (декабрь,1992 – ноябрь, 2000) пурнăçларĕ. Тамара Афанасьевна Кудряшова, налук инспекцийĕн начальникĕн çумĕ пулнă май, ĕç йĕркине, унăн çыхăнăвне витĕм кỹрес, аслă влаç йышăннă документсене вăхăтра тĕрĕс пурнăçлас енĕпе 1991- 2000 çулсенче, мĕн тивĕçлĕ канăва тухичченех, тăрăшса ĕçлерĕ. «Ĕç йышĕпе килĕштерсе ĕçлени манăн чĕрере нумайлăха асра юлчĕ», _ пĕлтерет вăл паян. 2001 çулхи декабрĕн 1-мĕшĕнче Шăмăршă районĕнче йĕркеленнĕ 2-мĕш номерлĕ инспекцире тĕрлĕ сыпăкра ĕçлекен специалистсен ушкăнĕ Космовский урамĕнче типлă проектпа хăпартнă 2 хутлă кирпĕч çурта вырнаçса ĕçлеме пуçларĕ. Ĕçне кура хисепĕ, теççĕ халăхра. Ку тытăмра ĕçленĕ специалистсен йышĕнче пысăк чыса тивĕçнисем яланлăхах асра пулмалла. Акă налук инспекцийĕн тĕп специалисчĕ Розалия Тимергалиевна Сейфутдинова чылай çул хушши тăрăшса ĕçленĕшĕн «Чăваш Республикин тава тивĕçлĕ экономисчĕ» ята тивĕçрĕ. Ăна Раççей Федерацийĕн Налук службин министерствин Хисеп грамотипе те наградăланă. 2011 çулхи ноябрĕн 5-мĕшĕнче Шăмăршă, Патăрьел, Елчĕк, Комсомольски районĕсенчи налук инспекцийĕсене пĕрлештерсе пĕр центр туса хучĕç. Вăл Комсомольски ялĕнче вырнаçнă. Паян Федерацин налук службин Чăваш Республикин районсем хушшинчи 2-мĕш номерлĕ инспекцийĕ Шăмăршă районĕн территорийĕнче уйрăм ĕç вырăнĕ шутланать. Вырăнти ĕçе Галина Витальевна Русская пурнăçласа пырать. Шăмăршăри налук инспекцийĕнче ĕçленĕ специалистсенчен чылайăшĕн урăх ĕç вырăнĕ шырама тиврĕ. Паян хăйсен ĕçри тивĕçне З.С.Кудряшова, Н.В.Ильина районсем хушшинчи 2-мĕш номерлĕ Комсомольски районĕнче тĕпленнĕ налук инспекцине тухса çỹресе пурнăçлаççĕ.
М.ЗАХАРОВ.