05 июля 2016 г.
ИРТНĔ шăматкун Вăрнар поселокĕнче Чăваш Республикинчи «Пограничниксен тăванлăхĕ» обществăлла организаци районсенчи уйрăмсем хушшинче мала тухассишĕн тăваттăмĕш турнир ирттерчĕ. Унта Шăмăршă районĕн туслă команди те хутшăнчĕ, вунпĕр команда хушшинче тăваттăмĕш вырăн йышăнчĕ. Отставкăри пограничниксем футболла, волейболла, кире пуканĕ йăтса тата пăшалтан тĕл перессипе ăмăртрĕç. Ю.Ф.Ермолаев, С.А.Хафизов, С.А.Матвеев, Н.А.Чернов, А.В.Шомполов, В.П.Никифоров, В.П.Казаков тата Раççей Федерацийĕн ФСБ офицер-пограничникĕ А.А.Антонов мини-футбол вăййинче _ иккĕмĕш, пăшалтан тĕл перессипе _ виççĕмĕш, волейбол вăййинче тата кире пуканĕ йăтса _ тăваттăмĕш вырăн йышăнма пултарчĕç. Çĕнтерỹçĕсене Дипломпа тата Грамотăпа чысларĕç. Шăмăршăри Н.А.Чернов ветерана вара 70 çул тултарнă ятпа «Пограничникăн тивĕçĕпе чысĕ» знакпа тата Грамотăпа хавхалантарчĕç. Организацин планĕпе килĕшỹллĕн, июлĕн 23-мĕшĕнче Комсомольскинче, августăн 6-мĕшĕнче вара Патăрьелĕнче спорт турнирĕ иртмелле. Шăмăршă районĕнчи отставкăри пограничниксем çак ăмăртусенче те хăйсене лайăх енчен çеç кăтартса парĕç тесе çирĕп шанса тăратăп.
Е.СЕТРИВАНОВ, «Пограничниксен тăванлăхĕ» обществăлла организацин Шăмăршă районĕнчи уйрăмĕн председателĕ.