08 июля 2016 г.
Гаврил Сабанов, Ирçе Тĕкки ялĕн каччи, пулас мăшăрне Патăрьел районĕнчи Шăхачра клубра пуçласа курнă. Çирĕм çулхи кăвак куçлă чипер Нина клуб заведующийĕнче ĕçленĕ. Вăрçă хыççăнхи çулсенче вунă класс пĕтернĕ çамрăксем ялта лайăх пĕлỹллĕ çынсем шутланнă. Вăтам шкула пĕр «виççĕсĕр» пĕтернĕ хĕрĕн малалла вĕренес ĕмĕчĕ те пулнă, анчах май пулман: амăшĕ йышлă çемьене пĕччен ура çине тăратнă. Ашшĕ Тăван çĕршывăн Аслă вăрçинчен таврăнайман, 1940 çулта çуралнă Нина ăна астумасть те...Гаврилăн шăпи те çакнашкалах, вăл та ашшĕне вăрçăран кĕтсе илеймен. Унăн вĕренес ĕмĕтне те вăрçă татнă – пĕчĕклех амăшне пулăшакан пĕртен-пĕр тĕрев пулса çитĕннĕ, унăн та шофер правине илнипех çырлахма тивнĕ. Çамрăксем пĕр-пĕрне килĕштернĕ, çулталăк çырусем çỹретнĕ хыççăн, 1961 çулхи июлĕн 8-мĕшĕнче, пĕрлешсе çемье çавăрнă. Ирçе Тĕккине качча килсен Нина почтальон тивĕçне пурнăçлама тытăнать. Ку ĕç çăмăл пулман _ эрнере 6 кун Ирçе Тĕккинчен Шăмăршăри почта узелне хаçат-журнал илме çуран çỹренĕ. Шăмăршăран таврăнсан ял тăрăх тата ăна валеçсе утса çаврăннă. Çапла вунă çул ĕçленĕ. Хĕллехи çил-тăманра та, хĕрхи йĕпе-сапара та почтальон сумккине çакса Ирçе Тĕккинчен Шăмăршă ялне, унтан _ каялла çулсăр-мĕнсĕр утнă та утнă. 1971 çулта район центрне пурăнма куçсан та çак ĕçпе тата 20 çул ĕçленĕ _ Шăмăршăри Карл Маркс, Красный Бор, Речная урамсенче пурăнакансем патне хаçат-журнал, çырусем вăхăтра çитерсе тăнă. 1990 çултанпа Нина Александровна 8 çул телеграфистра тăрăшнă, кунта та ĕçри тивĕçне яланах тỹрĕ кăмăлпа пурнăçласа пынă. Ахальтен мар унăн сăнỹкерчĕкне темиçе хутчен те районти Хисеп хăмине вырнаçтарнă. Çавăн пекех ăна Хисеп грамотисемпе те час-часах хавхалантарнă, «Ĕç ветеранĕ» ятпа чысланă. Гаврил Иванович _ районти ăста водительсенчен пĕри. «Шемуршинский» совхозра шоферта ĕçлеме тытăннă та вăл мĕн пенсие тухиччен _ 40 çул ытла! _ ялхуçалăхĕнче вăй хунă. Миçе пин тонна тырă леçнĕ-ши вăл çак хушăра Канашри элеватора _ хăй те пĕлмест. Яланах ĕçченлĕхĕпе, техникăна пĕр кăлтăксăр ĕçлеттерме пĕлнипе палăрса тăнă. Унăн сăнĕ те пĕрмаях районти Хисеп хăми çинче тăнă. Миçе хутчен «Социализмла ăмăрту çĕнтерỹçи» ята тивĕçнине те калаймасть ĕç ветеранĕ. Йышлă Хисеп хучĕсем хушшинче «Лучший водитель района» свидетельство, «Отличник автомобильных перевозок сельскохозяйственных продуктов урожая 1980г» хисеплĕ ят панине çирĕплетекен документсем те упранаççĕ. Сабановсем паян пĕрлешнĕренпе 55 çул çитнине паллă тăваççĕ. Уяв кĕрекинче _ 4 ачи, 4 мăнукĕ, 1 кĕçĕн мăнукĕ. Виçĕ хĕрĕпе ывăлĕ те аслă пĕлỹ илнĕ: педагог, экономист, библиотекарь, инженер-механик халĕ вĕсен çемйинче. Аслă мăнукĕсем те аслă пĕлỹллĕ, кĕçĕннисем вĕсен çулĕпе пыраççĕ. Ачисем çине пăхса савăнаççĕ вĕсем паян. _ Кашниех пурнăçра хăйĕн çул- йĕрне тупрĕ, ял-йыша нихăçан та начарпа калаçтарман. Ачасен телейне кура эпир те хамăра телейлĕ туятпăр, _ сăпайлă калаçать Нина Александровна. _ Çемье телейне упракан вăрттăнлăх çинчен пĕлесшĕн-и? _ Пĕр-пĕрне хисеплени, тỹсĕмлĕх, йывăр самантсене чăтса ирттерме пултарни пуль. Пуринпе те килĕштерме пĕлни те тесе хушса к алас килет. Вăт ăçта иккен вăл телей уççи! Хăй вăл мăшăрĕн амăшĕпе пĕр çуртра 45 çул килĕштерсе пурăннă, ăна тăван амăшĕ вырăнне хурса хисепленĕ. Хунямăшĕ те кинне пулăшса тăнă, ывăлĕпе кинĕ ĕçре чухне мăнукĕсемпе пĕрле кил-хуçалăхне тирпейлесе тăнă. Выльăх-чĕрлĕх те яланах йышлă тытнă _ хăш çул икшер ĕне те сунă. Ĕçсĕр ларман нихăçан та. Ачисене те пĕчĕкрен ĕçе хăнăхтарнă, тирпейлĕ, тăрăшуллă пулма вĕрентнĕ. Çакăн пек хисеплĕ мăшăр пурăнать пирĕн хушăра. Юбилярсене «Шăмăршă хыпарĕ» хаçат (Сабановсен юратнă хаçачĕ – чăвашла калаçма кăна мар, вулама та пултараççĕ) çирĕп сывлăх, ачисемпе мăнукĕсенчен пархатар сунать.
Г.ИВАНОВА.