15 июля 2016 г.
ÇУЛ-ЙĔР правилисене пăхăнманнине пула кăçалхи 1-мĕш çур çулта район территорийĕнчи çулсем çинче 7 авари пулса иртнĕ. Инкекре 7 çын аманнă, вилекенсем пулман. Пĕр авари эрех ĕçсе руль умне ларнă водителе пула сиксе тухнă, унта водитель хăй аманнă. Пилĕк пăтăрмах «Çĕрпỹ-Ульяновск» федераллă трасса çинче сиксе тухнă. Инкексен тĕп сăлтавĕсем водитель эрех ĕçнипе, хирĕç полоса çине тухнипе, хăвăртлăх виçине пăхăнманнипе çыхăннă. Пĕлтĕр çак хушăра 5 авари пулнă _ 3 çын аманнă, 6 çын пурнăçран уйрăлса кайнă. 2016 çулхи июнь уйăхĕнче çынсен сывлăхĕпе çыхăннă инкексем çул çинче пулман. Кăçалхи 6 уйăхра çул-йĕр правилисене пăснă 1113 çынна административлă майпа явап тыттарнă. Вĕсенчен 52 водителе _ руль умне ỹсĕрле ларнăшăн. Çавăн пекех 82 çуран çỹрекенпе должноçри 2 çынна та административлă майпа айăпланă. Çул-йĕр правилисене пăснăшăн вăхăтра штраф тỹлеменшĕн 45 çынна РФ КоАПăн 20.25 пайĕнчи статйипе килĕшỹллĕн административлă майпа явап тыттарма тивет. Çуран çỹрекенсене ятарлă вырăнсенче çул паманшăн 32 водителе штрафланă. Асăрхаттаратпăр: июль уйăхĕнче районта «Ỹсĕр водитель», «Çуран çỹрекен» ятпа республика пĕлтерĕшлĕ профилактика меро- приятийĕсем ирттерме палăртнă.
Г.ИВАНОВА, ГИБДДăн районти уйрăмĕн инспекторĕ.