15 июля 2016 г.
Шăмăршăри пĕр кафепе юнашарах пурăнатăп. Ем-ешĕл урам, кỹршĕ-аршă та лайăх. Лавккасем те çывăхрах. Кафере тăтăшах савăнăçлă мероприятисем иртеççĕ: туй-çуй, юбилей, ача çуралнине паллă тăвасси... Кашнинчех тỹпене фейерверк çĕкленет, лăпкăн çывăракан ачасем хăранипе шарт! сиксе вăранаççĕ. Çак фейерверксемпе салютсем, чăнах та, илемлĕ пуль-ха, анчах мĕншĕн пĕтĕм Шăмăрша сехĕрлентермелле? Кунĕпе ĕçлесе ывăннă çынсене каçхине 22 сехет хыççăн шăрт! та шарт! сасăпа вăратни, ачасем кăшкăрса йĕни пĕрре те лайăх япала мар. Çирĕплетнĕ йĕрке тăрăх, фейерверк яма ял тăрăхĕн администрацийĕпе МЧС службинчен ирĕк илмелле. Анчах пирĕн Шăмăршăра кам мĕнле пĕлет _ çапла хăтланать. Ятарласа çирĕплетнĕ сертификатсăр пиротехникăпа усă курни пысăк инкек кăларса тăратасран Турă сыхлатăрах. Раççей Федерацийĕн законодательствипе килĕшỹллĕн, ахаль кунсенче каçхине 22 сехетрен пуçласа 6 сехетчен, канмалли кунсенче 23 сехетрен пуçласа 9 сехетчен шăплăх вăхăчĕ шутланать. Апла пулсан, нимĕнле фейерверкпа салют та яма юрамасть. Çынсен канлĕхне вăйлă сасăпа сиен кỹнĕшĕн саккун тăрăх айăплама та пултараççĕ. Çỹлелле вут-кăвар вĕçсе чăл-пар саланни пушар тухас хăрушлăха та ỹстерет. Çывăхри çуртсенче пурăнакансем çĕр çывăраймаççĕ вара: утă-улăм е çурт-хуралтă çине хĕлхем ỹкес- рен чун сехĕрленет. Чăнах та, кашни çынах пурнăçри чи паллă пулăма ĕмĕр асра хăварасшăн, çавăнпах чылайăшĕ пиншер тенкĕ тỹлесе фейерверк туянма тăрăшать. Фейерверкпа салютсăр халĕ пĕр туй та, пĕр уяв та иртмест тесен те йăнăшмăп. Пин-пин тенкĕ укçа темиçе минут хушшинче вутпа çунса каять пулин те, савăнатпăр, кăшкăратпăр, шăхăратпăр. Фейерверкпа салют ямашкăн пачах та чарма чĕнсе каламастăп эпĕ, тата çак çĕнĕ йăлана хаçатра çырнипех пăрахăçлаймăн. Иртерех, çынсем çывăрма выртиччен ярсан, хальхи пек тарăхмăттăмăр. «Çăпатан _ кантри, пурнăçăн _ йĕрки пур», _ тенĕ ĕлĕкхи ватăсем. Çак йĕркене пăхăнса пурăнасчĕ. Эпир хытă шавласа савăнни ыттисене ан чăрмантартăр, никама та сиен ан кỹтĕр. Пиротехника пирки калас пулсан ăна алăран мар, ятарласах ирĕк панă лавккаран туянасчĕ, таварăн сертификачĕ пуррипе çуккине тĕрĕслесчĕ.
Ив.САЛАНДАЕВ.