26 июля 2016 г.
ШĂМĂРШĂ ял тăрăхĕн администрацийĕ район хаçачĕн июлĕн 22-мĕшĕнчи номерĕнче пичетленнĕ «Ах, пулмасть пуль, пул- масть пуль...» статьяна тĕрĕс те вырăнлă тесе шутлать. Чăнах та, çỹп-çаппа тĕрлĕ тасамарлăха турттарса тăрас ĕçре çирĕп йĕрке тумаллах.
ШĂМĂРШĂ ял тăрăхĕн администрацийĕ çак кунсенче Энтĕрьелĕнче тата Çĕнĕ Шăмăршăра ял пухăвĕсем ирттерчĕ, унта çỹп-çапа турттарса тăрас ыйтăва сỹтсе яврăмăр. Ял çыннисем çỹп-çапа михĕсенче пуçтарма килĕшсе татăлчĕç. Çỹп-çап турттаракан автомашина вĕсем патне пырсан, кашни михĕшĕн 40 тенкĕ тỹлемелле.
Июлĕн 31-мĕшне ял тăрăхĕн территорийĕнче тирпей-илем кунĕ тесе пĕлтертĕмĕр. Çак кун çỹп-çап турттаракан автомашина ирпе 9 сехетре Шăмăршă масарĕ çывăхĕнчи урамсенче, 12 сехетре _ Çĕнĕ Шăмăршă ялĕнче, 16 сехетре _ Энтĕрьелĕнче пулать. Çỹп-çапа михĕсене тултарса кĕтсе тăма ыйтатпăр. Аса илтеретпĕр: пĕр михĕ çỹп-çап турттарса кайнăшăн 40 тенкĕ тỹлемелле.
Малашне Шăмăршăри комбинат тăрăхĕнчи тата Красный бор урамсенче те контейнерсене пуçтарса илетпĕр. Çỹп-çапа михĕсенче упрасан, ятарлă автомашина пырса тиесе кайĕ. Урамсенчи контейнерсене пуçтарса илни ялта тирпей-илем тума тата тỹлев дисциплинине çирĕплетме пулăшасса шанатпăр. Ял çыннисене çапла чĕнсе калатăп: тирпейлĕ пулар, тавралăха варалар мар!
Н.Дмитриев , Шăмăршă ял тăрăхĕн пуçлăхĕ.