26 июля 2016 г.
«ЧĂВАШ ВĂРМАНĔ» наци паркĕнче чĕрчунсене сăнама тата шута илме фотокапкăн вырнаçтарнă. Çакă чĕрчунсен пурнăçне тĕпчесе пĕлме тата интереслĕ кадрсем ỹкерме май парать. Мĕн чухлĕ çĕннине пĕлме пулать çак меслет пулăшнипе! Фотообъектива пуринчен ытла хир сыснисем лекеççĕ. Вĕсем наци паркĕнче хăйсене питех те лайăх туяççĕ. Хир сыснисен йышĕ те ỹссех пырать. Паркăн сыхлав пайĕ вĕсене çулталăк тăрăшшĕпех сăнаса тăрать, апат-çимĕçпе те тивĕçтерет. Кăçалхи июнь уйăхĕнче фотокапкăна хир сыснисен кĕтĕвĕ «çакланнă», унта кăçалхи çамрăк çурасем те лекнĕ. Хир сыснисен пурнăçне кадрсенче ытларах çĕрлехи вăхăтра е ир-ирех сăнама пулать. Кăнтăрла вĕсем сулхăнта пытанса выртаççĕ, çĕрле вара апат шырама тухаççĕ. Фотокапкăн сунар йĕркине пăсакансене тупса палăртма та май парать.
О.РЕВУНОВА, «Чăваш вăрманĕ» наци паркĕн методисчĕ.