09 августа 2016 г.
ШКУЛ ачисене патриот воспитанийĕ парасси - пысăк пĕлтерĕшлĕ ĕç. Кунта шкул ачисен «Зарница» тата «Орленок» çар вăййисем пысăк вырăн йышăнаççĕ. Шăмăршă районĕнчи Карапай Шăмăршă вăтам шкулĕнче кашни çулах çар вăййисене тивĕçлĕ шайра ирттереççĕ, ахальтен мар çамрăк армеецсем тăтăшах республикăра та Дипломсене тивĕçеççĕ. Кăçал вара «Зарница» команда Ю.Ермолаев ертсе пынипе Патăрьел районĕнче иртнĕ республика ăмăртăвĕнче çĕнтерỹçĕ пулса тăчĕ. Çакă шкул ачисемшĕн питех те пысăк çитĕнỹ. Кăçалхи сентябрь уйăхĕнче вара çĕнтерỹçĕ командăн Чăваш Ен чысне Атăлçи округĕнчи финал вăййинче хỹтĕлеме тивет. Çавна май çамрăк армеецсем çуллахи каникул вăхăтĕнче çине тăрсах унта тивĕçлĕ хутшăнма хатĕрленеççĕ: вăй-хал тĕлĕшĕнчи конкурссенче пиçĕхеççĕ, винтовкăран тĕл пеме хăнăхаççĕ, автомата вăхăтпа салатса пуçтараççĕ, граната ывăтаççĕ, стройпа утаççĕ... Кашни кунах çапла шкула пуçтарăнаççĕ, Юрий Федорович сĕнĕвĕсене тĕпе хурса хăйсене аталантараççĕ.
Чăваш Республикин Вĕрентỹпе çамрăксен политики министерствин сайтĕнчен.