23 августа 2016 г.
ÇАК кунсенче Карапай Шăмăршă ял тăрăхĕнчи ĕç ветеранĕсем районти паллă вырăнсенче пулса курчĕç. Экскурсие йĕркелекенсем: ял тăрăхĕн пуçлăхĕ В.Яковлев тата ветерансен ертỹçи В.Столяров.
Чăн малтанах тивĕçлĕ канăва тухнă пенсионерсем Шăмăршăри «Туслăх» спорт комплексне çитсе курчĕç, унти бассейнпа спорт залĕсене курса çỹрерĕç. Ун хыççăн ипподрома кĕрсе чарăну турĕç. Кунта та нумай улшăну курса тĕлĕнчĕç. Ахальтен кăçалхи Акатуя унта йĕркелесе ирттермен ĕнтĕ _ çĕнĕ объектсем илем кỹреççĕ халь ипподрома. Кун хыççăн ватăсем Васанти халăх музейне çул тытрĕç. Унта та курмалли пайтах иккен – музей çулсерен пуянлансах пырать, экспонатсем çĕнелсех тăраççĕ. Экскурсие килнĕ хăнасене музей директорĕ Г.Ларшников хапăл туса кĕтсе илчĕ, кашни стенд тĕлĕнче чарăнса тăчĕ, халăх кунçулĕ çинчен хавхаланупа, асра юлмалла каласа кăтартрĕ. Тăван халăхăн историйĕ кашнинех хумхантарчĕ, шухăша ячĕ...
Палтиел «тинĕсне» те çитсе курчĕç тăван тăрăхпа интересленекенсем. Вĕçсĕр-хĕрсĕр шыв сарăлса выртать иккен унта _ ку вырăнсем палламалла мар улшăннă...
Экскурси пурне те килĕшрĕ. Тăван Карапай Шăмăрша таврăнсан тырпул пухса кĕртекенсем патне, «Хлюкин О.А.» фермер хуçалăхне те çитсе килме шутларĕç ĕç ветеранĕсем. Тăван ял-йыша концертпа савăнтарма та пултарулăх çук мар вĕсен _ ялхуçалăх ĕçченĕсене хавас юрă-кĕвĕ парнелерĕç. Аккомпаниатор тивĕçĕнче яланхи пекех Н.Медведева баянистпа В.Столяров купăсçă пулчĕç.
Çапла интереслĕ пурăнаççĕ карапайсем. Çулĕсемпе пенсире пулсан та, чунĕсемпе çамрăк вĕсем.
А.ШОМПОЛОВА.