26 августа 2016 г.
ШĂМĂРШĂ ял тăрăхне кĕрекен ялсенче çỹп-çап тăкмалли контейнерсене пуçтарса илни, вĕсен вырăнне михĕсемпе усă курма пуçлани çинчен хаçатра çырнăччĕ ĕнтĕ. Калас пулать, çак пуçарăва халăх ырласа йышăнчĕ. Çỹп-çапа михĕсенче упрама тытăннăранпа урамсем те тасалса пыраççĕ, саккунсăр свалкăсен шучĕ нумай чакрĕ. Пĕр михĕ çỹп-çапшăн 40 тенкĕ тỹленине халăх хаклă темест. Михĕсене пушатнă хыççăн каялла илме те пулать.
Çỹп-çап турттарнăшăн тỹлес ĕç те лайăхланчĕ. Енчен те маларах халăхран 1300 тенкĕ пухнăччĕ пулсан, юлашки хутĕнче 4 пин тенкĕ ытла пуçтарăнчĕ. Çỹп-çап турттаракан автомашинăпа пĕрле коммуналлă хуçалăх представителĕ çỹрени тỹлев ĕçне нумай çăмăллатать.
Ял тăрăхĕнче пурăнакансене çỹп-çап пуçтармалли графикпе тепĕр хут паллаштарас килет. Аса илтеретĕп: çỹп-çапа кашни уйăхăн иккĕмĕш тата тăваттăмĕш шăматкунĕнче тиесе каяççĕ. 8 сехетрен пуçласа 10 сехетчен _ Шăмăршăри Красный Бор, Мир, Восточная, Строительсен, Чапаев, Южная, Новая, Дорожниксен тата Животноводсен урамĕсенче (ăнланмалларах пултăр тесе вырăсла çыратăп), 10 сехетрен пуçласа 12 сехетчен _ Çĕнĕ Шăмăршăра, 12 сехетрен пуçласа 14 сехетчен _ Шăмăршăри Заречная, 70 лет Октября, Луговая, Корчагин, Молодежная, Заводская, Овражная урамĕсенче, 14 сехетрен пуçласа 16 сехетчен _ Энтĕрьелĕнче, 16 сехетрен пуçласа 18 сехетчен _ Ирçе Тĕккипе Баскакра (кашни уйăхăн юлашки шăматкунĕнче) çỹп-çап турттаракан автомашина пулать.
Хисеплĕ ял-йыш, ентешĕмсем! Атьăр-ха çирĕплетнĕ графикпе килĕшỹллĕн пуçтарăннă çỹп-çапа тиесе ярар, тăван ял илемĕшĕн пурте тăрăшар.
Н.ДМИТРИЕВ, Шăмăршă ял тăрăхĕн пуçлăхĕ.