30 августа 2016 г.
ВЫРМА ĕçĕсем вĕçленсе пыни механизаторсен савăк кăмăлĕнчен те сисĕнет. Калаçаççĕ, шỹтлеççĕ, пĕр-пĕрне сăмахпа тĕртсе те илеççĕ. Пĕр уйăха яхăн хирте вĕт, тинех çын пек йĕркеллĕ канма пултарĕç. «Умлă-хыçлă виçĕ кун мунча хуттаратăп арăма», _ шỹтлерĕ пĕри. «Эпĕ телевизорпа кино курасшăн. Атту киле таврăнатăн та, ывăннипе çывăрса та каятăн», _ терĕ тепри, çамрăкраххи.
«Мир» хуçалăхăн йĕтемĕ. Кунта эпĕ тахçантанпа паллакан Ракия Махмутована тĕл пултăм. 28 çул хушши Палтиелĕнче почтальонкăра ĕçленĕ хыççăн тивĕçлĕ канăва тухнă. Халĕ весовщицăра тăрăшать.
_ Йĕтеме килнĕ тырра тасатса вăрлăх хатĕрлетпĕр, кĕлете кĕртетпĕр, _ пĕлтерчĕ Ракия. _ Кирам Невметов, Николай Актемеев, Леонид Сергеев, Рамиль Алтынбаев машинистсене, Ольга Паймина, Наталия Юманова, Галина Яковлева, Ольга Савельева, Резине Атнагулова, Раиса Еремеева, Гузель Файзрахманова тата Лилия Алтынбаева рабочисене мухтама ан манăр. Кунне 30 тонна тырă тасатса вăрлăхлăх хыватпăр.
«Искра» СХПК йĕтемĕ пире заводри пек кĕрлевпе кĕтсе илчĕ. Тырра тасатса типĕтекен КЗС агрегат хиртен килнĕ пуянлăха пĕр чăрмавсăр йышăнать. Складсен заведующийĕ Рефис Сейфутдинов каланă тăрăх, хальлĕхе 80 тонна тулă, 75 тонна урпа, 25 тонна сĕлĕ вăрлăхĕ хатĕрленĕ.
Кунта арçынсен коллективĕ ĕçлет. Марс Хуснетдинов, Минзаит Шарапов, Керим Еремеев пур ĕçе те тăрăшса тăваççĕ. КЗС тасатнă тырă тỹрех склад пỹлмисене куçать. Вăрлăх хатĕрленипе пĕрлех, ял халăхне те тырăпа тивĕçтереççĕ.
«Восход» хуçалăхра кĕраки пуçланнă. 44 çул хушши механизаторта ĕçлекен Валентин Псаровпа калаçатăп.
_ Пенсире ĕнтĕ, пурпĕрех килте ларма чун хушмасть. Чĕре уй-хирех туртать. Ман пек ватти тата Владимир Буранов пур. Пире чи яваплă ĕçе шанаççĕ те, ята ярас килмест, _ терĕ Валентин Моисеевич.
Хирти шăплăха ДТ-75 трактор кĕрлевĕ татрĕ. Валерий Васильев механизатор виçĕ сеялкăллă агрегатпа Владимир Буранов сухаласа хатĕрленĕ çĕр çине кĕрхи тулă акма пуçларĕ.
Вăй патăр, сире, çĕр ĕçченĕсем! Хирте тепре куриччен!
Ив.САЛАНДАЕВ.